راوێژکارێکی سەرۆکی پەرلەمانی ئێران: هێرشەکەی ئەمریکا زیانێکی وای نەبووە

 ئاڤا نیوز 

ڕاوێژکاری سەرۆکی پەرلەمانی ئێران بۆ کاروباری ستراتیژی لەبارەی هێرشەکەی ئەمریکا بۆ سەر بنکە ئەتۆمییەکانی وڵاتەکەی رایگەیاند، هێرشەکە زیانێکی وای نەبووە و پێشوەختە ئامادەکاری بۆ ئەم سیناریۆیە کرابوو.

 

بڵاوکراوەی فەرمی: مەهدی محەممەدی، ڕاوێژکاری سەرۆکی پەرلەمانی ئێران بۆ کاروباری ستراتیژی لە ئێکس ڕایگەیاند، ئەو هێرشە بۆ سەر بنکەی ئەتۆمیی فۆردۆ، شتێکی سەرسوڕهێنەر نەبوو، ماوەیەکی زۆر لەمەوبەر ئەو شوێنە چۆڵ کرابوو، هێرشەکە زیانێکی وای نەبووە کە نەتوانرێت چاک بکرێتەوە، تاران پێشوەختە ئامادەکاری بۆ ئەم سیناریۆیە کردبوو.

 

زانیاریی بەدەستهاتوو: ئاژانسی هەواڵی فەرمیی ئێران (ئێرنا) ئاشکرای کرد، پێگە ئەتۆمییە ئامانجکراوەکان، ماددەی تیشکدەریان تێدا نەبووە، ئەمەش وەک هەوڵێک بۆ دڵنیاکردنەوەی خەڵک کە هیچ تیشکێکی ئەتۆمی و کارەسات ڕوو نادات.

 

ئەوەی لەبارەیەوە دەگوترێت: دۆناڵد ترەمپ، سەرۆکی ئەمریکا لەبارەی هێرشەکەوە رایگەیاند "کۆتاییمان بە فۆردۆ هێنا و هەڕەەشەکانی ئێران نەمان."

 

باکگراوند: لە دەیەم ڕۆژی جەنگی نێوان ئێران و ئیسرائیل، بەرەبەیانیی ئەمڕۆ (22-6-2025) هێزی ئاسمانیی ئەمریکا هەر سێ دامەزراوەی ئەتۆمیی فۆردۆ، نەتەنز و ئەسفەهانی بە شەش بۆمبی GBU-57 و چەندین جۆر مووشەکی دیکە پێگە ئەتۆمییەکانی ئێرانی بۆمبباران کرد.