مانگی سووری ئێران: کەس لە ئەنجامی هێرشەکەی ئەمریکا نەکوژراوە

ئاڤا نیوز 

 

دەستەی مانگی سووری ئێران دەڵێ هێرشەکانی ئەمریکا بۆ سەر دامەزراوە ئەتۆمییەکانی ئێران، نەبوونە هۆی کوژرانی هیچ کەسێک.

 

لێدوانی فەرمی: پیرحەسەن کۆلیڤەند، سەرۆکی دەستەی مانگی سووری ئێران، ئەمڕۆ (یەکشەممە) رایگەیاند "بە خۆشحاڵییەوە هیچ شەهیدێکمان لە رووداوەکانی دوێنێ شەو (بەرەبەیانیی ئەمڕۆ) بۆ سەر دامەزراوە ئەتۆمییەکانی ئێران، تۆمار نەکرد."

چیرۆکی سەرەکی: لەکاتێکدا سەرۆک و وەزیری دەرەوەی ئەمریکا دەڵێن ئۆپەراسیۆنەکەیان سەرکەوتوو بووە و بەرنامەی ئەتۆمیی ئێرانیان وێران کردووە، میدیا جیهانییەکان باس لەوە دەکەن، ئێران پێش هێرشەکەی ئەمریکا کەرەستە سەرەکییەکانی بەتایبەتی لە وێستگەی ئەتۆمیی فۆردۆ، گواستووەتەوە شوێنی دیکە.
 
ئەوەی لەبارەیەوە دەگوترێت: میدیا جیهانییەکان هەندێ وێنەیان بڵاوکردنەوە کە دوو ڕۆژ پێش هێرشەکە لەلایەن مانگی دەستکردەوە گیراون، وێنەکان جووڵەی ژمارەیەکی زۆر بەرهەڵگر لە وێستگەی ئەتۆمیی فۆردۆ نیشاندەدەن، کە ئەمە گومانەکان زیاتر دەکات لەوەی کەرەستە سەرەکییەکانی ئەم وێستگەیە گوازرابنەوە.

 

لەلایەکی دیکە: لەدوای هێرشەکەی بەرەبەیانیی ئەمڕۆی ئەمریکا بۆ سەر سێ پێگەی سەرەکی ئەتۆمی ئێران 'نەتەنز، ئەسفەهان و فۆردۆ'، مەترسی ئەوە هەبوو تیشکدانەوەی ئەتۆمی زیان بە خەڵک و ناوچەکە بگەیێنێت، بەڵام بەرپرسانی و ئاژانسی نێودەوڵەتیی وزەی ئەتۆم ڕایانگەیاند، هیچ مەترسییەکی تیشکدانەوە لەو پێگە  ئەتۆمییانە نییە.

 

هەروەها مەهدی محەممەدی، ڕاوێژکاری سەرۆکی پەرلەمانی ئێران بۆ کاروباری ستراتیژی لە ئێکس ڕایگەیاند، ئەو هێرشەی ئەمریکا شتێکی سەرسوڕهێنەر نەبوو. ئەو شوێنە ماوەیەکی زۆر لەمەوبەر چۆڵ کرابوو و هێرشەکە زیانێکی وای نەبووە کە نەتوانرێت چاک بکرێتەوە، تاران پێشوەختە ئامادەکاری بۆ ئەم سیناریۆیە کردبوو.