ئێران هەڕەشە دەکات: لەچەند کاتژمێری داهاتوو وەڵاممان دەبێت

ئاڤا نیوز

سەرچاوەیەکی ئاگاداری ئێرانی دووپاتی دەکاتەوە ئێران خۆی بۆ هێرشکردنە سەر ئامانجە ئیسرائیلی - ئەمریکییەکان لە چەند کاتژمێری داهاتوودا ئامادە دەکات.

وێنە گەورەکە: گرژییەکان لە ناوچەکەدا تاوەکو دێت زیاتر پەرە دەسێنن، ئەمەش دوای ئەوەی ویلایەتە یەکگرتووەکانی ئەمریکا بەرەبەیانی ڕۆژی یەکشەممە چەند هێرشێکی ئەنجامدا کە دامەزراوە ئەتۆمییەکانی فۆردۆ، نەتەنز و ئەسفەهانی کردە ئامانج و ڕایگەیاند کە بە تەواوی وێرانی کردوون.

زانیاریی بەدەستهاتوو: سەرچاوە ئێرانییەکە کە قسەی بۆ میدیای عێراق کردووە ئاماژە بۆ ئەوە دەکات "ئێران لە چەند کاتژمێری داهاتوودا هێرش دەکاتە سەر سێ ئامانجی ئیسرائیلی -ئەمریکی."

زانیاریی زیاتر: بە گوتەی سەرچاوەکە "دوو لەو ئامانجانە لە دەرەوەی ئیسرائیلن" بەبێ ئەوەی شوێن و وڵاتەکان ئاشکرا بکات.

لەلایەکی دیکەوە: حوسێن شەریعەتمەداری ڕایگەیاند: بێ دوو دڵی و دواخستن دەبێت وەکو هەنگاوی یەکەم بە مووشەک بۆردوومانی کەشتیی دەریاوانیی ئەمریکا لە بەحرەین بکەین، دواتر گەرووی هورمز دابخەین، هاوکات ڕێگری لە هاتووچۆکردنی کەشتییەکانی ئەمریکا، بەریتانیا، ئەڵمانیا و فەرەنسا بکەین.

ئەوەی پێویستە بیزانیت: لە پاش گورزە ئەمریکییەکە، ئێران هەڕەشەی تۆڵەکردنەوەی سەربازیی کرد لەناو ئیسرائیلدا و ئەگەری هەیە بنکە ئەمریکییەکانیش لە ناوچەکەدا بکاتە ئامانج، بەپێی ئەوەی میدیا ئێرانییەکان ڕایانگەیاندووە.