حیزبوڵڵا: هێرشەکەی ئەمریکا ڕووی ڕاستەقینەی ئاشکرا کرد و ناوچەکە بەرەو دۆخێکی نادیار دەبات

ئاڤا نیوز

حیزبوڵای لوبنان بە تووندی هێرشەکەی ئەمریکا بۆ سەر دامەزراوە ئەتۆمییەکانی ئێران سەرکۆنە دەکات و ڕایدەگەیێنێت، ئەم کارە "پەرەسەندنێکی شێتانە و مەترسیدارە" و ڕووی ڕاستەقینەی واشنتنی وەک "گەورەترین هەڕەشە" بۆ سەر ئاسایشی جیهان ئاشکرا کرد.

وێنە گەورەکە: بەرەبەیانی ڕۆژی یەکشەممە، هێزی ئاسمانیی ئەمریکا هەرسێ دامەزراوەی ئەتۆمی فۆردۆ و نەتەنز و ئەسفەهانی لە ئێران لە ڕیگەی فڕۆکەی B2 کردە ئامانج و خاپووری کردن.

ڕاگەیێنراوی فەرمی: لە ڕاگەیێنراوێکدا حیزبوڵڵای لوبنان جەختی کردەوە کە ئەم هێرشە پێشێلکارییەکی ئاشکرای یاسا نێودەوڵەتیی و مرۆییەکان، ڕێککەوتننامەکانی جنێڤ و پەیماننامەی نەتەوە یەکگرتووەکانە، چونکە هێرشکردنە سەر دامەزراوە ئەتۆمییەکان و بەکارهێنانی هێز دژی وڵاتانی خاوەن سەروەری، قەدەغەکراوە.

لە هەمانکاتدا: حیزبوڵڵا هۆشداریی دا کە ئەم کارە "فراوانبوونی بازنەی جەنگ"ـی لێدەکەوێتەوە و ئەگەر هەڵوێستی تووند بۆ ڕێگریکردن لە ئەمریکا وەرنەگیرێت، ئەوا ناوچەکە و جیهان بەرەو "دۆخێکی نادیار" و ئاڵۆزتر دەبات.