ترەمپ: لە مانگە دەستکردەکان دەردەکەوێت بنکە ئەتۆمییەکانی ئێران سڕاونەتەوە

ئاڤا نیوز

 

سەرۆکی ئەمریکا لەبارەی هێرشەکەی سوپای وڵاتەکەی بۆ سەر بنکە ئەتۆمییەکانی ئێران دەڵێت،  "زیانێکی زۆر  بە بنکە ئەتۆمییەکانی ئێران کەوتووە، ئەمەش لە مانگە دەستکردەکان دەرکەوتووە، گەورەترین زیانیش بە ناوەوەی بنکەکان کەوتووە، [سڕینەوە] دەستەواژەیەکی ڕاستە بەکاریبهێنم".

 

وێنە گەورەکە:  بەرەبەیانیی ڕۆژی یەکشەممە، ئەمریکا لەڕێگەی فڕۆکەی بی 2 هێرشی کردە سەر هەر سێ پێگەی سەرەکیی ئەتۆمیی ئەسفەهان، فۆردۆ و نەتەنز لە ئێران و خاپووری کردن؛ لە هێرشەکەدا کە بە گوتەی بەرپرسانی ئەمریکا بۆمبی حەشارگەشکێن و نزیکەی 30 تۆماهۆک بەکارهێنراوە.

 

لێدوانی فەرمی: دۆناڵد ترەمپ، سەرۆکی ئەمریکا لە تۆڕی کۆمەڵایەتیی ترووس سۆشیاڵ نووسیوویەتیی، "زیانی زۆر بە  بنکە ئەتۆمییەکانی ئێران کەوتووە، ئەمەش لە مانگە دەستکردەکان دەرکەوتووە، گەورەترین زیانیش بە ناوەوەی بنکەکان کەوتووە، [سڕینەوە] دەستەواژەیەکی ڕاستە بەکاریبهێنم، پێکهاتە سپییەکە لەنێو بەرد بوو، بنمیچەکەشی زۆر لەوەوە بوو، پارێزراو بوو لە ئاگر، بەڵام گەورەترین زیان بە بەشی ناوەوەی کەوت."

 

لەلایەکی دیکەوە: دۆرێسی شەی، باڵیۆزی ئەمریکا لە ئەنجوومەنی ئاسایشی نێودەوڵەتیی لە کۆبوونەوەی نائاسایی شەوی رابردووی ئەنجوومەنی ئاسایش لەسەر پرسی هێرشی ئەمریکا بۆ سەر ئێران، ڕایگەیاند: ئەمریکا لە چوارچێوەی پارێزگاریکردن لە ئیسرائیل، هێرشی کردووەتە سەر پێگە ئەتۆمییەکانی ئێران و بەردەوام دەبن لەو پارێزگارییە، ئەگەر ئێران پلانی وەڵامدانەوەی هەبێت و هێرش بکاتە سەر هەر بنکە و بەرژەوەندیەکی ئەمریکا لە رۆژهەڵاتی ناوەڕاست، "وەڵامی ویرانکەرمان بۆ ئێران دەبێت و بە هێزێکی زیاترەوە هێرشیان دەکەینە سەر."

 

ئەوەی پێویستە بیزانیت: پێشتر ئێران هۆشداریی ئەوەی دابووە واشنتن؛ ئەگەر هێرش بکاتە سەر بنکە ئەتۆمییەکانی، بەرژەوەندییەکانی ئەمریکا لە ڕۆژهەڵاتی ناوەڕاست دەکەنە ئامانج.