چین داوای گفتوگۆ و دانوستانی نێوان ئیسرائیل و ئێران دەكات

ئاڤا نیوز

وەزیری دەرەوەی چین داوای گفتوگۆ و دانوستان لەنێوان ئیسرائیل و ئێران دەکات. دەشڵێت، هێرشەکانی ئەمریکا بۆ سەر دامەزراوە ئەتۆمییەکانی ئێران پێشهاتێكی زۆر خراپە.

وێنە گەورەکە: جەنگی نێوان ئیسرائیل و ئێران نزیک دەبێتەوە لە دوو هەفتە، سەرەڕای هەوڵە نێودەوڵەتییەکان بۆ کۆتاییهێنان بە جەنگ، بەڵام هەردوولا بەردەوامن لە بۆردوومانکردنی یەکتر.

لێدوانی فەرمی: وانگ یی، وەزیری دەرەوەی چین ئەمڕۆ ڕۆژی دووشەممە ڕایگەیاند، هێرشەکانی ئەمریکا بۆ سەر دامەزراوە ئەتۆمییەکانی ئێران پێشهاتێكی زۆر خراپە.

- پێویستە هەموو لایەنەکان بۆ كۆتاییهاتن بە ململانێكان ڕێككاری پێویست بگرنەبەر و بگەڕێنەوە بۆ گفتوگۆ و دانوستان.

وەزیری دەرەوەی چین پێی وایە كە هێرشەکانی ئیسرائیل بۆ سەر ئێران هەڕەشەیە بۆ داهاتوو و دۆخیی ئەمنیی ناوچەكە و جیهانیش تێكدەدات.