قۆناغی یەکەمی ئاگربەستی ئیسرائیل و ئێران دەستیپێکرد

ئاڤا نیوز 

 

ترەمپ لەنێو گەرمەی جەنگی ئێران و ئیسرائیل، ئاگربەستی دوولایەنەی نێوانیانی راگەیاند، " کە بەیانیی ئەمڕۆ دەستیپێکرد."

 

وێنە گەورەکە: دوای بەردەوامبوونی جەنگ بۆ ماوەی 12 ڕۆژ، دۆناڵد ترەمپ، سەرۆکی ئەمریکا رایگەیاند جەنگەکە دەبێت ناوی بنرێت 'جەنگە 12 رۆژییەکە' چونکە هەردوولا لەسەر ئاگربەست رێککەوتوون.

 

زانیاریی زیاتر: ئاژانسی فارسی ئێران بڵاویکردەوە؛ ئاگربەستەکە لە کاتژمێر 07:30ـی بەیانیی ئەمڕۆ (دووشەممە) بە کاتی ناوخۆی ئێران دەستیپێکرد، ئەمەش دوای ئەوەی ئێران، زنجیرەیەک هێرشی مووشەکییی دیکەی ئاراستەی ئیسرائیل کرد.

 

ئەمەش بزانە: هەر ئەمڕۆ بنیامین نەتەنیاهۆ، سەرۆکوەزیرانی ئیسرائیل لەگەڵ بەرپرسانی باڵای وڵاتەکەی کۆبووەوە، نووسینگەکەشی رایگەیاند لە کۆبوونەوەکەدا نەتەنیاهوو گوتوویەتی ئیسرائیل ئامانجەکانی و زیاتریشی لە ئۆپەراسیۆنەکەیدا لەدژی ئێران بەدەستهێنا، هەڕەشەکانی لەسەر نەما و سوپاسی ترەمپ دەکەن بۆ یارمەتیدانیان.

 

باکگراوند: دۆناڵد ترەمپ بەرەبەیانیی ئەمڕۆ (بەکاتی هەولێر) نەخشەڕێگەی جێبەجێکردنی وادەی ئاگربەستەکەی بەمشێوەیە ڕاگەیاندبوو؛ دوای نزیکەی 6 کاتژمێر (07:30ـی بەیانی بە کاتی تاران) ئێران بە فەرمی دەست بە ئاگربەست دەکات، دوای 12 کاتژمێر ئیسرائیلیش دەست بە ئاگربەست دەکات و لە 24 کاتژمێردا جەنگە 12 رۆژییەکە بە فەرمی کۆتایی دێت.