ژمارەی کوژراو و بریندارانی جەنگی نێوان ئیسرائیل و ئێران ئاشکرا دەکرێت

ئاڤا نیوز

 

جەنگی نێوان ئیسرائیل و ئێران لەماوەی 12 ڕۆژدا،  638 کوژراو و زیاتر لە 5000 برینداری لەهەردوو بەرەی جەنگ لێکەوتووەتەوە. 

 

چیرۆکی سەرەکی: دوای 12 ڕۆژ لە جەنگی نێوان ئیسرائیل و ئێران، بەرەبەیانیی ئەمڕۆ سێشەممە دۆناڵد ترەمپ، سەرۆکی ئەمریکا ئاشکرای کرد، هەردوو وڵات ڕازیبوون بە ئاگربەست و ئاگربەستەکە کەوتووەتە بواری جێبەجێکردنەوە. 

 

لێدوانی فەرمی: حوسێن کرمانپوور، وتەبێژی وەزارەتی تەندروستی ئێران لە هەژماری تایبەتی خۆی لە تۆڕی کۆمەڵایەتی ئێکس نووسیویەتی: لە سەرەتای جەنگی نێوان ئیسرائیل و وڵاتەکەی 610 کەس گیانیان لەدەستداوە لە نێویاندا 13 منداڵ هەبوون، هاوکات زیاتر لە چوار هەزار و 700 کەسی دیکەش برینداربوون و پێنج پزیشکیش بوونە قوربانی .

 

لەلایەکی دیکەوە:  ئیسرائیل لەزاری سەرچاوەیەکی پزیشکی ئاشکرای کرد، جەنگی وڵاتەکەی لەگەڵ ئێران 28 کوژراو و زیاتر لە 1300 برینداری لێکەوتووەتەوە کە زۆربەیان هاووڵاتیانی مەدەنی ئیسرائیلی بوون.