لە هەولێر تەنیا 7 حیزب ئامادەییان دەربڕی بەشداری هەڵبژاردنەکانی عێراق بکەن

ئاڤا نیوز

دوا وادە لەلایەن کۆمیسیۆنی باڵای سەربەخۆی هەڵبژاردنەکانی عێڕاق کە بە حیزب و لایەنە سیاسیەکانی عێڕاق و هەرێمی کوردستان درابوو بۆ ڕادەستکردنی لیستی کاندیدەکانیان کۆتایی هات، لە ئۆفیسی هەولێر تەنیا 7 حزب لیستەکانیان پیشکەش بە کۆمیسیۆن کرد. 
 
وێنە گەورەکە: بڕیارە هەڵبژاردنی خولی شەشەمی ئەنجومەنی نوێنەرانی عێڕاق لە 11ـی مانگی 11ـی ئەمساڵ بکرێت، ئامادەکارییەکانی کۆمیسیۆن بەردەوامە و بەشێک لە حیزب و لایەنە سیاسیەکانیش دەستیان کردووە بە ئامادەکاری بۆ هەڵبژاردنەکە. 
 
لێدوانی فەرمی: مەڕوان محەممەد ساڵح، بەرپرسی ئۆفیسی هەولێری کۆمیسیۆنی باڵای سەربەخۆیی هەڵبژاردنەکانی عێڕاق بە ئاڤای ڕاگەیاند: دوای وەستانی بەرنامەی ئەلیکترۆنی و تەواوبوونی دەوامی فەرمی لەئەمڕۆدا 26ـی حوزەیران وەک دوا وادە بۆ تۆمارکردنی لیستی کاندیدی حیزب و لایەنە سیاسیەکان، لە ئۆفیسی کۆمیسیۆنی هەڵبژاردنەکان تەنیا 7 حیزب (پارتی، یەکێتی، نەوەی نوێ، یەکگرتوو، بەرەی گەل، هەڵوێست و بەرەی تورکمانی)، و 2 کاندیدی سەربەخۆ کە لەسەر کورسیە گشتییەکان کێبڕکێ دەکەن، و 3 کاندیدیش بۆ کۆتای کریستیان، لیستی کاندیدەکانیان ڕادەستی کۆمیسیۆن کردووە، و ئامادەیی خۆیان دەربڕیوە بەشداری هەڵبژاردنی داهاتوو بکەن. 
 
ئەوەی پێویستە بیزانیت: ڕادەستکردنی لیستی کاندیدانی حیزب و لایەنە سیاسیەکان بە کۆمیسیۆن دوا وادەی 24ـی حوزەیران بوو، بەڵام وەک دەرفەتێک دوو ڕۆژی دیکە لە لایەن کۆمیسیۆن درێژکرایەوە و تاوەکو ئەمڕۆ 26ـی حوزەیران مۆڵەت بە حیزب و لایەنە سیاسیەکان درابوو.