هاوپەیمانیی حەیدەر عەبادی بەشداری هەڵبژاردنی پەرلەمانی عێراق ناکات و هۆکارەکەی دەخاتەڕوو

ئاڤا نیوز

 

هاوپەیمانیی حەیدەر عەبادی، سەرۆک وەزیرانی پێشووتری عێراق، بەشداری هەڵبژاردنی پەرلەمانی عێراق ناکات و تەنیا پشتیووانی بەشێک لە کاندیدانی هاوپەیمانی "هێزەکانی دەوڵەت" دەکات.

 

وێنە گەورەکە: بڕیارە ڕۆژی 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت و چاوەڕێش دەکرێت نزیکەی پێنج هەزار کاندید کێبرکێ لەسەر 329 کورسییەکەی ئەنجوومەنی نوێنەرانی عێراق بکەن.

 

ڕاگەیێنراوی فەرمی: هاوپەیمانی نەسر کە حەیدەر عەبادی، سەرۆکوەزیرانی پێشووتری عێراق سەرۆکایەتی دەکات، بڵاویکردەوە: هاوپەیمانێتییەکە لە هەڵبژاردنی داهاتووی پەرلەمانی عێراق هیچ کاندیدێکی نابێت و تەنیا پشتیووانی لەو کاندیدانەی خاوەن ئەزموون و بەتوانان لە لیستی هاوپەیمانی "هێزەکانی دەوڵەت" بەسەرۆکایەتیی عەممار حەکیم، دەکات. 

 

هۆكاره‌ زانراوه‌كان: هاوپەیمانێتییەکە هۆکاری بەشدارینەکردنی لە هەڵبژاردن دەخاتەڕوو و دەڵێت، بەکارهێنانی سامانی گشتی بۆ بەرژەوەندیی تایبەت، ڕێگرینەکردن لە کڕینی دەنگ و دەستوەردانی دەرەکی، هۆکاری بەشدارینەکردنی هاوپەیمانی نەسرە لە هەڵبژاردنی داهاتووی پەرلەمانی عێراق.

ئەمەش بزانە: هاوپەیمانی نەسر یەکێکە لە لایەنە سەرەکییەکانی نێو چوارچێوەی هەماهەنگی و خاوەنی یەک کورسی پەرلەمانی خولی پێنجەمی پەرلەمانی عێراقە.