عێراق سیستمی بەرگریی ئاسمانی پەرەپێدەدات

ئاڤا نیوز

ئەندامێکی لیژنەی ئاسایش و بەرگری لە پەرلەمانی عێراق هەوڵەکانی عێراق بۆ واژۆکردنی گرێبەستی پڕچەککردن لەگەڵ پێنج وڵات بۆ پەرەپێدانی سیستمی بەرگریی ئاسمانی ئاشکرا دەکات.

 

ئەوەی پێویستە بیزانیت: سەروەریی ئاسمانی عێراق لە کاتی جەنگی نێوان ئێران و ئیسرائیلدا، بۆ ماوەی 12 ڕۆژ ڕووبەڕووی چەندین پێشێلکاری و بەزاندن بووەوە.

 

لێدوانی فەرمی: عەلی بەنداوی، ئەندامی لیژنەی ئاسایش و بەرگریی پەرلەمانی عێراق بە میدیای وڵاتەکەی ڕاگەیاند، "عێراق پێویستی بە سیستمێکی بەرگریی ئاسمانیی پێشکەوتووە بۆ پاراستنی ئاسمان و خاکی عێراق لەهەر پێشێلکارییەکی دەرەکی و دەستدرێژیکردنێک بۆ سەر سەروەریی خاکەکەی".

 

ئەوەی ئێستا ڕوودەدات: بەگوتەی بەنداوی، حکومەتی عێراق دەستی بە جووڵە کردووە بۆ لای پێنج وڵات، لەنێویاندا ئەمریکا، فەرەنسا، کۆریای باشوور و وڵاتانی دیکە، بۆ واژۆکردنی گرێبەست بۆ هاوردەکردنی چەکی پێشکەوتوو بۆ پڕچەککردنی سوپای عێراق.

 

ئەوەی چاوەڕوان دەکرێت: عێراق خۆی ئامادە دەکات بۆ واژۆکردنی گرێبەست لەگەڵ چەندین وڵاتدا بۆ هاوردەکردنی سیستمی بەرگریی ئاسمانی و ئامێری ڕاداری پێشکەوتوو، سەرباری چەکی پێشکەوتووی دیکە.