مالیکی: دەبێت پێداچوونەوە بە دەزگا ئەمنیی و سەربازییەکاندا بکرێت

ئاڤا نیوز

 

سەرۆکوەزیرانی پێشووتری عێراق دەڵێت، وڵات لە هەڕەشە و مەترسییەکان بەدوور نییە، بۆیە پێویستە پێداچوونەوە بە کاری دەزگا ئەمنی و سەربازییەکاندا بکرێت و هەموو ڕێگەیەكیش بۆ بەرگریکردن لە وڵات وەبەرچاو بگیردرێت.

 

وێنە گەورەکە: هەرچەندە عێراق ڕاداری هەیە و دەتوانێت چاودێری ئاسمانیی وڵاتەکەی بکات لە بوونی هەر تەنێكی نامۆی وەك درۆن و فڕۆکەی بێ فڕۆكەوان، بەڵام سیستەمی بەرگریی ئاسمانی نییە تا ڕووبەڕوویان ببێتەوە و تێکیان بشکێنێت، بەمەش ناتوانێت ئاسمانیی وڵاتەکەی بپارێزێت.

 

لێدوانی فەرمی: نووری مالیکی، سەرۆکی هاوپەیمانیی دەوڵەتی یاسا و سەرۆکوەزیرانی پێشووتری عێراق، لە پەیامێکدا بەبۆنەی سەری ساڵی کۆچییەوە دەڵێت: چاکسازی، تەنیا درووشمێک نییە بۆ مەبەستی سیاسی و حیزبی بەرز بکرێتەوە، بەڵکو ڕوانگەیەکی ستراتیژییە بۆ چاککردنەوەی هەڵە و خاڵە لاوازەکانی دەوڵەت و باشترکردنی دۆخی خەڵک. لەو چوارچێوەشدا پێویستە پێداچوونەوەی خێرا بە کاری دەزگا ئەمنیی و سەربازییەکاندا بکرێت تا پاراستنی وڵات لە بەرامبەر هەڕەشە دەرەکییەکان گەرەنتی  بكرێت.

 

ئاماژەی بەوەش کرد: عێراق لە هەڕەشە و مەترسییەکانی شەڕ کە ئیسرائیل دەستی پێکردووە پارێزراو نابێت، بۆیە پێویستە عێراقمان هاوشێوەی وڵاتانی دیکەی ناوچەکە بەهێزبێت و هەموو ڕێگەیەكی پێویست بۆ بەرگریکردن لە سەروەرییەکەی فەراهەم بكرێت.