بەشێک لە کارمەندانی باڵیۆزخانەی ئەمریکا دەگەڕێنەوە بەغدا

ئاڤا نیوز

 

بەشێک لە کارمەندانی باڵیۆزخانەی ئەمریکا، دوای 17 ڕۆژ لە جێهێشتنی باڵیۆزخانەكەیان بەهۆی ئاڵۆزی دۆخی ئەمنییەوە،  گەڕانەوە بەغدا و دەستیان بە کار کردەوە.

 

وێنە گەورەکە: پێشتر وتەبێژی باڵیۆزخانەی ئەمریکا لە بەغدا بە ئاڤا میدیای ڕاگەیاندبوو، 12ـی ئەم مانگە و ڕۆژێک بەر لە دەستپێکی جەنگی نێوان ئیسرائیل و ئێران، بە لەبەرچاوگرتنی زیادبوونی گرژییەکان، هەنگاو بە هەنگاو دەستیان کرد بە کەمکردنەوە و گواستنەوەی بەشێک لە کارمەندەکانیان.

 

بینراو و بیستراو: ئاژانسە نێودەوڵەتییەکان دیمەنی ساتی نیشتنەوەی دوو هێلیکۆپتەریان لەنێو باڵیۆزخانەی ئەمریکا لە بەغدا بڵاوکردەوە کە بەشێک لە کارمەندانی باڵیۆزخانەکە دادەبەزن بۆ ئەوەی بگەڕێنەوە سەر کارەکانیان.

 

گۆشەیەکی دیکەی دیمەکە: 22ـی حوزەیران، ئەمریکا هێرشێکی ئاسمانی کردە سەر ناوەندە ئەتۆمییەکانی ئێران، بەگوێرەی هەواڵی ئاژانسەکان و زیادبوونی مەترسییەكانی تۆڵەسەندنەوە، ڕۆژانی 21 و 22ـی ئەم مانگە زۆربەی کارمەندە دیپلۆماسییەكانی ئەمریکا عێراقیان جێهێشت، بەڵام ئێستا دوای هێوربوونەوەی دۆخەکە هەنگاو بە هەنگاو دەگەڕێتەوە سەر کارەکانیان.