پێش هێرشەکەی ئیسرائیل بۆ سەر زیندانی ئێڤین چی ڕوویدا؟

ئاڤا نیوز

 

فۆکس نیوزی ئەمریکی لە ڕاپۆرتێکیدا ئاماژە بەوە دەکات کە موسادی ئیسرائیل بەر لە هێرشەکەی سەر گرتووخانەی ئێڤین لە تاران، پەیوەندیی بە کوڕی بەرپرسی زیندانەکەوە کردووە و پێیان وتووە کە بە باوکی بڵێت، دەرگای زیندانەکە بکاتەوە و لە زیندان بچێتە دەرەوە چونکە سوپای ئیسرائیل دەیەوێت بۆردوومانی بکات.

 

چیرۆکی سەرەکی: فۆکس نیوز سکرینشۆتی واتسئاپێکی بڵاو کردووەتەوە کە تیایدا گفتوگۆی نێوان ئەمیر حوسێن، کوڕی هیدایەتوڵڵای فەرزادی، سەرۆکی زیندانی ئێڤین، نیشان دەدات. 

 

بڵاوکراوەی فەرمی: بە گویرەی هەواڵێکی فۆکس نیوز، ئەمیر حوسێن پەیوەندی بە مامیەوە دەکات و پەیامەکەی پێدەگەیێنێت، ئەویش بە ئۆتۆمبێل دەچێت بۆ بەندیخانە و پەیامەکە دەگەیێنێتە فەرزادی و بەم شێوەیە بەر لە هێرشەکە فەرزادی لە زیندانەکە دەچێتە دەرەوە.

 

لەلایەکی دیکەوە: ئێران ئەمە بە درۆ دەخاتەوە و دەڵێت: لە کاتی هێرشەکەدا سەرۆکی زیندان لەناو زیندانەکە بووە و ژوورەکانی بەسەر کردوونەتەوە، بەڵام بەیاننامەی دەستەڵاتی دادوەری هیچ ئاماژەیەکی بە سکرینشۆتی چاتی واتسئاپەکە نەکردووە، نە پشتڕاستی کردووەتەوە، نە بەدرۆی خستووەتەوە. 

 

باکگراوند: هیدایەتوڵڵا فەرزادی، کە لە 2022ـەوە سەرۆکی زیندانی ئێڤینە، لەلایەن ئەمریکا و یەکێتیی ئەوروپاوە سزادراوە لەبەر ئەوەی زیندانەکە ناوبانگێکی خراپی هەیە لە مامەڵەکردن لەگەڵ زیندانییەکان و پێشێلی مافەکانی مرۆڤ و ئەشکەنجەدانی بەندکراوەکان.