سەرەڕای هەوڵەکان بۆ ئاگربەست سوپای ئیسرائیل ئۆپەراسیۆنەکانی لە غەززە تووندتر دەکات

ئاڤا نیوز

سەرەڕای هەوڵەکانی ڕاگرتنی جەنگ لە کەرتی غەززە لە نێوان ئیسرائیل و فەلەستینییەکان، سوپای ئیسرائیل ئۆپەراسیۆنە سەربازییەکانی لە کەرتەکە فراوانتر دەکات و داوا لە خەڵکی چەند ناوچەیەک دەکات شوێنەکانیان جێبهێڵن.

وێنە گەورەکە: سەرەڕای هەوڵەکانی وڵاتانی نێوەندگێڕی وەکو قەتەر، ئەمریکا و میسر بۆ ڕاگرتنی جەنگ، بەڵام ئیسرائیل ئۆپەراسیۆنەکانی لە کەرتی غەززە زیاتر کردووە، پێشبینی دەکرێت ژمارەی قوربانیان لەو کەرتە زیاتر بن.

ڕاگەیێنراوی فەرمی: ئەفیخای ئەدرەعی، وتەبێژی سوپای ئیسرائیل ڕایگەیاند: هۆشداری دەدەین خەڵکی ناوچەی شاری غەززە و جەبالیا کە گەڕەکەکانی زەیتوونی شەرقی، بەلدەی قەدیمە، تورکمان، ئەجدیدە، توفاح، دەرەج، جەبالیای بەلەدە، جەبالیای نەزلە، موعەسکەر جەبالیا، ڕەوزە، نەهزە، زهوور، نوور، سەلام و تەلزەعتەر دەگرێتەوە، لەپێناو سەلامەتیتان دەستبەجێ ئەو ناوچانە چۆڵ بکەن و بەرەو ناوچەی موواسی لە باشوور بڕۆن.

زانیاریی زیاتر: سوپای ئیسرائیل زۆر بە تووندی لەو ناوچانە کار دەکات و ئۆپەراسیۆنە سەربازییەکان زیاتر دەبن و بەرەو ڕۆژئاوا تاوەکو ناوەڕاستی شارەکە فراوان دەکرێن. وتەبێژی سوپای ئیسرائیل، ئەمەشی وت.

ئەوەی پێویستە بیزانیت: بەگوێرەی چەند سەرچاوەیەکی سەربازیی ئیسرائیلی، سوپای ئەو وڵاتە بەنیازە پێنج فیرقەی سەربازی تەواو (نەک فیرقەی لاوەکی و بەش بەش وەک لە پێشوودا هەبوو) لە ناوچە جیاوازەکانی کەرتی غەززە جێگیر بکات.