16 تۆمەتباری فرۆشتنی ئامێری قۆپیەكردن دەستگیر دەكرێن

ئاڤا نیوز

لە هەولێر 16 تۆمەتبار دەدۆزرێنەوە كە لە تۆڕە كۆمەڵایەتییەكان بانگەشەی فرۆشتنی وەڵامی پرسیارەكانی پۆلی 12ـیان دەكرد، هاوكات ئامێری گزیكردن 'قۆپیەكردن'ـیان بەشێوەی ئۆنلاین فرۆشتووە.

وێنە گەورەكە: ئێستا تاقیكردنەوەی كۆتایی پۆلی 12ـی ئامادەیی لە ناوەندەكانی خوێندن بەڕێوە دەچێت، بە مەبەستی ڕێگریكردن لە هەرجۆرە دیاردەیەكی زیانبەخش كە كاریگەری لەسەر پرۆسەی تاقیكردنەوەكان دروست دەكات و لەپێناو فەراهەمكردنی كەشێكی ئارام بۆ قوتابیان، دەزگای ئاسایشی هەرێمی كوردستان بەهەماهەنگی لەگەڵ وەزارەتی پەروەردەی حکومەتی هەرێمی كوردستان، ڕێگری دەكات لە هەر هەوڵێكی مامەڵەكردن بە ئامێرەكانی قۆپیەكردن و دزەپێكردنی پرسیارەكانی ئەزموونەكان.

ڕاگەیێنراوی فەرمی: به‌ڕێوه‌به‌رایه‌تیی ئاسایشی‌ هه‌ولێر لە ڕاگەیێنراوێكدا ئاماژه‌ی‌ به‌وه‌دا كه‌ دوای ئه‌نجامدانی به‌دواداچوون له‌لایه‌ن تیمه‌كانیان،‌ له‌سه‌ر ئه‌و هه‌ژمارانه‌ی كه‌ له‌ تۆڕه ‌كۆمه‌ڵاتییه‌كان بانگه‌شه‌ی وه‌ڵامی پرسیاره‌كانی پۆلی 12 و فرۆشتنی ئامێری تایبه‌ت به‌ 'گزی - قۆپیەكردن'ـیان ده‌كرد، توانیویانە ناسنامه‌ی 16 تۆمه‌تبار ئاشكرا بكەن كه‌ ئه‌و كاره‌یان ئه‌نجامداوه‌، به‌فه‌رمانی دادوه‌ری لێكۆڵینه‌وه‌ی ئاسایشی هه‌ولێر سه‌رجه‌م تۆمه‌تباران له‌ چه‌ند چالاكییه‌كی جیاوازدا ده‌ستگیر كراون.

- په‌ڕاوی لێكۆڵینه‌وه‌ بۆ تۆمەتبارانی دەستگیركراو كراوه‌ته‌وه‌ و دواتر دۆسیه‌كانیان ڕه‌وانه‌ی پۆلیسی هه‌ولێر كراوه‌، له‌كاتی ده‌ستگیركردنیشیان ده‌ستگیراوە به‌سه‌ر (37) ئامێری بیستۆكی گزیكردن.

- به‌ڕێوه‌به‌رایه‌تیی ئاسایشی هه‌ولێر راشیگه‌یاند، "هه‌وڵه‌كانمان به‌رده‌وام ده‌بن له‌ دۆزینه‌وه‌ و ده‌ستگیركردنی ئه‌و كه‌سانه‌ی كه‌ ئه‌م كاره‌ نایاساییه‌ ئه‌نجام ده‌ده‌ن".