پەرلەمانتارێکی دەم پارتی بۆ ئاڤا: بە ئەگەری زۆر پڕۆسەی چەکدانانی پەکەکە لە هەرێمی کوردستان دەبێت

ئاڤا نیوز

بە گوتەی پەرلەمانتارێکی دەم پارتی، حکومەتی تورکیا داوا دەکات پڕۆسەی چەکدانانی پەکەکە بە هەماهەنگی هەواڵگریی تورکیا و عێراق و لەژێر چاودێری حکومەتی هەرێمی کوردستان ئەنجام بدرێت، بۆیە بە ئەگەری 90%، پڕۆسەكە هەر لە هەرێمی دەبێت، بەڵام "كەی و چۆنیەتییەكەی هێشتا دیار نییە".

وێنە گەورەکە: لە چوارچێوەی پڕۆسەی ئاشتی و لەسەر داوای عەبدوڵڵا ئۆجەلان، پارتی كرێكارانی كوردستان (پەکەکە) دوانزەمین کۆنگرەی خۆی بەست و بڕیاری دا خۆی هەڵبوەشێنێتەوە و چەک دابنێت، بەڵام تا ئێستا پڕۆسەی چەکدانانەکە دەستی پێ نەكردووە.

لێدوانی فەرمی: محەممەد کەماچ، پەرلەمانتاری دەم پارتی بە ئاڤا میدیای ڕاگەیاند: حکومەتی تورکیا داوای کردووە پڕۆسەی چەکدانانی پەکەکە لە ڕێگەی ڤیدیۆکۆنفڕانسێکەوە و لە هەرێمی کوردستان ئەنجام بدرێت، چەکەکانیان ڕادەستی هێزە ئەمنییەکان بكەن.

زانیاریی بەدەستهاتوو: ئاڤا زانیویەتی، هەواڵگریی تورکیا و عێراق، کار بۆ ڕێکخستنی میکانیزمی چەکدانانەکە دەکەن. ئەم قسانەی کەماچ لە کاتێکدایە، ڕەجەب تەیب ئەردۆغان، سەرۆککۆماری تورکیا دوێنی گوتی: پڕۆسەی چەکدانانی پەکەکە جێبەجێ دەكرێت. 

لەلایەکی دیکەوە: کەماچ سەبارەت بە پێکهێنانی لیژنەیەکی پەرلەمان بۆ کارکردن لەسەر پڕۆسەی ئاشتی گوتی: لەم چەند ڕۆژەدا، ئەو شەش پارتەی فراکسیۆنییان هەیە، پێشنیازەکانیان بدەنە پەرلەمان تا لە ناوەڕاستی مانگی 7 لیژنەکە پێک بهێنرێت. بڕیارە هەر پارتەی پێنج ئەندامیان لە لیژنەکە هەبێت، پەرلەمانتارەکانی دیکە کە فراکسیۆنیان نییە، بەشدار دەبن لە لیژنەكە.