تورکیا مۆڵەتی نیشتەجێبوون بۆ بەشێک لە عێراقییەکان نوێ ناکاتەوە

ئاڤا نیوز

بەهۆی نوێنەکردنەوەی مۆڵەتی نیشتەجێبوونیان لەلایەن دەسەڵاتدارانی تورکیاوە، سەدان هاووڵاتیی عێراقی نیشتەجێی ئەو وڵاتە ڕووبەڕووی دەرکردن و دیپۆرتکردنەوە دەبنەوە.

چیرۆکی سەرەکی: دەسەڵاتدارانی تورکیا مەرج و ڕێکارەکانی مۆڵەتی نیشتەجێبوونیان بۆ عێراقییەکان بەجۆرێک توندکردووە، زۆربەی داواکاریی نوێی نیشتەجێبوون و داواکاری ئەو عێراقییانەی ساڵانێکە لە تورکیا دەژین و نیشتەجێن ڕەتدەکرێنەوە.

ڕاگەیێنراوی فەرمی: ڕۆژنامەی عەرەبی جەدید لەڕاپۆرتێکدا بڵاوی کردەوە: بەهۆی ڕێکاری نوێی تورکیا لە ماوەی ساڵی ڕابردوودا، دەیان هەزار عێراقی بۆ وڵاتەکەیان گەڕاونەتەوە یاخود گەڕێنراونەتەوە، ئەو عێراقییانەشی کە تاوەکو ئێستا لەتورکیا ماونەتەوە و نیشتەجێی ئەو وڵاتەن بەهۆی پەیوەندی خێزانی، پەروەردەیی، پزیشکی، ئەوانەشی پڕۆژەی بازرگانی و ئابوورییان هەیە و خاوەنی ماڵ و خانووبەرەن لەتورکیا تادێت بەرەوڕووی بژاردەی قورس دەبنەوە.

شێوازی جێبه‌جێكردن: بەپێی یاسای تورکیا، هاووڵاتییانی عێراق مافی بژاردەی جۆراوجۆری نیشتەجێبوونیان هەیە لەو وڵاتە، لەوانە گەشتیاری، کڕینی مولک و ماڵ، خوێندن، کار و نیشتەجێبوونی خێزان، ئەم بژاردانەش بە جێبەجێکردنی هەندێک مەرج بەدەست دەهێنرێن، لەوانە داهاتێکی جێگیر و بیمەی تەندروستی، لەماوەی دوو ساڵی ڕابردووشدا، تورکیا مەرجی زیاتری بۆنیشتەجێبوونی هاووڵاتیانی عێراقی داناوە و تەنیا لەچەند پارێزگایەک و چەند گەڕەکێک بۆیان هەیە نیشتەجێبن.

لەلایەکی دیکەوە: وەزارەتی دەرەوەی عێراق ئاشکرای دەکات،  حکومەتی تورکیا پاساوی خۆی هەیە بۆ گرتنەبەری هەر ڕێوشوێنێکی لەگەڵ بارودۆخی ناوخۆ و ئابوورییەکەی گونجاو بێت و عێراق ناتوانێت کاریگەری لەسەر بڕیارەکانی تورکیا هەبێت.

ئەوەی پێویستە بیزانیت: بەپێی داتاکانی پێشووی وەزارەتی کۆچ و کۆچبەرانی عێراق، نزیکەی 700 هەزار عێراقی لە 12 پارێزگای تورکیا بەپێی ڕیزبەندی لە ئیستەنبوول، ئەنقەرە، سامسون، ساکاریا، یالۆڤا، بورسا، ئەسکیشەهیر، غازی عەنتاب، ئالانیە، گۆرەمێ، بۆلو و کوتاهیا نیشتەجێن.