کێشەی مووچەی کەسوکاری شەهیدانی بەرگری و فریاکەوتن چارەسەر دەکرێت

ئاڤا نیوز

کەسوکاری شەهیدانی بەرگری و فریاکەوتن لە سلێمانی کێشەی ڕاگرتنی مووچەکانیان هەیە، بەرپرسانی هەردوو وەزارەتی ناوخۆ و داراییش بە ئاڤا میدیایان ڕاگەیاند، داواکارییەکەیان گەیشتووە و لە نزیکترین کاتدا کێشەکەیان چارەسەر دەبێت.

چیرۆکی سەرەکی: ئەمڕۆ کەسوکاری شەهیدانی بەرگری و فریاکەوتن لە بەردەم مەکتەبی سیاسی یەکێتیی لە سلێمانی گردبوونەوە کە ژمارەیان 146 کەسە، کێشەکەیان ئەوەیە لە مانگی ئەیلوولی ساڵی پارەوە پێیان وتراوە مووچەکانیان لە فەرماندەیی بەرگری و فریاکەوتنەوە دەچێتە سەر وەزارەتی شەهیدان، کەچی نۆ مانگە مووچەکانیان ڕاگیراوە.

لێدوانی فەرمی: شێروان مەحموود، نوێنەری خانەوادەی شەهیدانی پێشمەرگەی بەرگری و فریاکەوتن لە کۆنفرانسەکەدا بەدوای مایکەکەی ئاڤا دەگەڕا کە هات وتی ئاڤای لێ نییە؟، دواتر پەیامنێری ئاڤا لێدوانێکی تایبەتی لێوەرگرت، ئەو وتی، "پێشتر شەهیدەکانمان مووچەیان هەر لە شوێنی دەوامی خۆیان بەردەوام بووە، بەڵام لە مانگی نۆی ساڵی ڕابردووەوە، پێمان وتراوە مووچەکانمان دەچێتە سەر وەزارەتی شەهیدان، پێشیان وتین تەنیا سێ مانگ مووچەکانتان ڕادەگیرێ، کەچی ئەوە نۆ مانگە مووچەمان وەرنەگرتووە."

خاڵی ئەرێنیی: بەرپرسانی وەزارەتی ناوخۆ لەسەر ئەم کێشەیە بە ئاڤا میدیایان ڕاگەیاند، "لەگەڵ وەزارەتی دارایی لەسەر خەتین و پێویستە کێشەکەیان چارەسەر بکرێت، لەسەدا سەدیش بەم نزیکانە بۆیان چارەسەر دەکەین".

لەلایەکی دیکەوە: بەرپرسانی وەزارەتی دارایی و ئابووریی هەرێمی کوردستانیش بۆ ئاڤا باسیان لەوەکرد، "ئەمڕۆ کۆبوونەوەیەکی تایبەتمان لەسەر ئەو بابەتە کردووە و لە نزیکترین کاتدا کێشەکەیان چارەسەر دەکرێت".