لە بەغدا هێزێکی ئەمنی هەڵدەکوتنە سەر کەناڵێکی ئاسمانی و دایدەخەن

ئاڤا نیوز

بەبێ هیچ پاساوێک هێزێکی ئەمنی هەڵدەکوتنە سەر کەناڵی  حەدەسی عێراقی لە بەغدای پایتەخت و  ڕوانگەی عێراقیش بۆ ئازادی ڕۆژنامەگەری ئیدانەی ئەو کردەوەیە دەکات.

ڕاگەیێنراوی فەرمی: لە بەیاننامەیەکدا ڕوانگەی عێراقی بۆ ئازادی ڕۆژنامەگەری ڕایگەیاند: بەرپرسانی کەناڵی حەدەسی عێراق، ڕوانگەی عێراقییان بۆ ئازادیی ڕۆژنامەگەری ئاگادار کردووەتەوە، ئەمڕۆ هێزێکی ئەمنیی هاوبەش لەگەڵ هێزێکی هەواڵگری و نوێنەری دەستەی ڕاگەیاندن و پەیوەندییەکان هەڵیانکوتایە سەر کەناڵەکە لە بەغدا و پەخشەکەیان ڕاگرت.

لێدوانی فەرمی: هادی جەلو مەرعی، سەرۆکی  ڕوانگەی عێراقی بۆ ئازادی ڕۆژنامەگەری بەئاڤا میدیای ڕاگەیاند: داخستنی کەناڵی حەدەس لەبەغدا ڕووداوێکی چاوەڕواننەکراوبوو، هاوکات هەڕەشە لە سەر ئازادی ڕادەربڕین و ڕۆژنامەگەری لە عێراق درووست دەکات.

لەلایەکی دیکەوە: سەرچاوەیەکی ئاگادار لەبەغداوە بەئاڤا میدیای ڕاگەیاند، کەناڵی ئاسمانی حەدەسی عێراق بنکەی سەرەکی لە بەغدایە و  ماوەی پێنج مانگە دەستی بە پەخشی هەواڵ و بەرنامەکانی کردووە، ئاراستەی کەناڵەکەش تاڕادەیەک پێچەوانەی کارەکانی حکومەتەکەی سوودانییە.