ڕۆژنامەی حورییەت: 50 چەکداری پەکەکە لە دهۆک چەکەکانیان ڕادەست دەکەن

ئاڤا نیوز

بڕیار وایە پڕۆسەی چەکدانانی پەکەکە لەم چەند ڕۆژە دەستپێبکات و لە ماوەی 10 ڕۆژدا پڕۆسەکە کۆتایی بێت و چەکە ڕادەستکراوەکانیش لەلایەن هێزە ئەمنییەکانەوە تۆمار بکرێن. بەپێی ڕاپۆرتێکی ڕۆژنامەی حورییەتی تورکی، 50 چەکداری پەکەکە لە پارێزگای دهۆک چەکەکانیان ڕادەست دەکەنەوە.

وێنە گەورەکە: پڕۆسەی ئاشتی لە تورکیا پێی ناوەتە قۆناغێکی نوێ، چەکدانانی پەکەکە کە بەهۆی شەڕی ئێران و ئیسرائیل دواخرا، یەکەم قۆناغی لەماوەی ئەم هەفتەیەدا دەچێتە بواری جێبەجێکردنەوە.

زانیاریی بەدەستهاتوو: ڕۆژنامەی حورییەتی تورکی لە ڕاپۆرتێکدا ڕایگەیاندووە: 50 چەکداری پەکەکە لە ناوچەیەکی سەر بە پارێزگای دهۆک کە 160 کیلۆمەتر لە تورکیا دوورە، چەکەکانیان ڕادەست بە هێزە ئەمنییەکان دەکەن.

ڕۆژنامەی حورییەتی تورکی لە ڕاپۆرتەکەیدا ئاماژەی بەو خاڵانەش کردووە:

٠ ڕادەستکردنی چەک لەژێر کۆنترۆڵی چاودێراندا دەبێت. ئەو چەکانەی ژمارەکانیان و تایبەتمەندی و سەرچاوەکانیان دیاری دەکرێت تۆمار دەکرێن. 

٠ ئەو ئەندامانەی پەکەکە کە چەکەکانیان ڕادەست دەکەن، دواتر دەگەڕێنەوە بۆ کەمپ و حەشارگەکانی خۆیان.

٠ کاتێک پڕۆسەکە تەواو بوو، ئەو کەمپ و حەشارگانەی کە چەکدارانی پەکەکە لێی دەمانەوە چۆڵ دەکرێن و لە ژێر کۆنترۆڵی حکومەتی عێراقدا دەهێڵرێنەوە.

٠ تورکیا ڕاستەوخۆ سەیری بەرێوەچوونی پڕۆسەکە دەکات کە چاوەڕێ دەکرێت لە ڕێگەی ڤیدیۆکۆنفرانسەوە بێت.

٠ پڕۆسەی ڕادەستکردنی چەک لەلایەن تورکیا و حکومەتی ناوەندی عێراق و هەرێمی کوردستان وەک چاودێرێکی هاوبەش چاودێری دەکرێت. پێشهاتەکانی چاودێری دەکرێن و دەستبەجێ دەکرێنە ڕاپۆرت و دەنێردرێن.

٠ نەتەوە یەکگرتووەکان (UN) یان هەر وڵاتێکی سێیەمی دیکە بەشداری پڕۆسەکە ناکەن. ئەگەر پڕۆسەکە بە شێوەیەکی ئەرێنی بەرەوپێش بچێت، پلان هەیە تا مانگی ئەیلوول پەکەکە هەموو چەکەکانی خۆی ڕادەست بکات.

باکگراوند: دوای بانگەوازەکەی دەوڵەت باخچەلی، سەرۆکی مەهەپە، بۆ پڕۆسەی ئاشتی، عەبدوڵڵا ئۆجەلان، ڕێبەری زیندانیکراوی پەکەکە لە 27ـی شووبات داوای لە سەرجەم گرووپەکانی پەکەکە کرد، خۆیان هەڵبوەشێننەوە و چەکەکانیان ڕادەست بکەنەوە، پەکەکە لە 12ـی ئایار کۆنگرەی بەست و هەڵوەشاندنەوەی خۆی ڕاگەیاند.