ئاسایشی قەوارەی هەرێم لە سەروو ململانێ سیاسییەكانەوە

لەم ماوەیەدا ئەوەی لە لێدوان و قسە و باسی هەندێک پەرلەمانتار و كەسایەتی سەربە پارتە ئۆپۆزسیۆنەكان بەتایبەت ئیسلامییەكان دەخوێنرایەوە جگە لە دژایەتی قەوارەی هەرێمی كوردستان هیچ خوێندنەوەیەكی دیکەی هەڵنەدەگرت و بەتەواوی جێی پرسیار بوو، چونكە بە ئاشكرا بەزاندنی سنوورەكانی رێككەوتنی نیشتمانی بوو.

 

دەبێ دە جار بیربكەیتەوە بزانیت ئایا پاڵنەری ئەمانە چییە كاتێک لە لێدوان و چاوپێكەوتنەكانیاندا رەچاوی ئاسایشی نیشتمانی وڵات و قەوارەكەیان ناكەن؟ ئایا چ سوودێک لەم لێدوانە پر لە گومانانە دەبینن كە دەكرێ بەرامبەر وەک فشار دژی هەرێمەكە بەكاری بهێنێت؟ بە كورتییەكەی ئەمانە بۆ وادەكەن؟

 

بۆنموونە تۆ چیت دەستدەكەوێت لەوەی تۆمەتی ئەوە بۆ هەرێمەكەت دروستبكەیت؛ گوایە "لەم هەرێمەوە درۆن و سیخوڕ براوەتە ناو وڵاتێكی دراوسێ"؟ لە كاتێكدا تۆ بۆئەم قسانە یەک بەڵگەشت نییە، تەنها تەحلیل و لێكدانەوەی خەیاڵی خۆتە.

 

لە راستیدا ئەمە قسەیەكە رێک دەبێ دوژمنی هەرێمەكە لە دەرەوە بیكات و تۆ رەتی بكەیتەوە، بەڵام كەتۆ خۆت دەیكەیت دەبێ هەزار پرسیار و گومان لەسەر ئینتیمات بۆ ئەم خاک و وڵاتە دابنرێت.

 

یان پەرلەمانتارێكی تری عێراق (كورد) بە رۆژی رۆشن لە بەرنامەیەكی تەلەفزیۆنیدا دەڵێت "هەرێم بوەتە سەرچاوەی هەڕەشە بۆ سەر عێراق…."! یان دەڵێت "بەعسییەكان لەهەرێمەوە خەریكن سەر هەڵدەدەنەوە و دەبنە هەڕەشە بۆ سەر عێراق بۆیە بەغدا مووچەی فەرمانبەرانی هەرێمی راگرتووە"! 

 

زۆرێكی دیکە لەم قسە سەیروسەمەرانە كە لەم ماوەیەدا لە زاری چەند كەسایەتییەكی بەناو ئۆپۆزسیۆن لە سەروبەندی ڕووداوەكانی ئەم ناوچەیە دەبیستران، جێی لێكۆڵینەوەن.

 

لە راستیدا ئەگەر تۆ وەک رۆژنامەوان ئەو لێدوانانە بهێنیت بەبێ ئەو كەسەی قسەكەی كردووە، پاشان لە چەند كەس بپرسیت ئەمە قسەی كێیە؟ یەک كەس خەیاڵی بۆ ئەوە ناچێت ئەمانە قسەی كەسی سیاسیی كورد بن، بەڵكو بێ سێ و دوو هەمووان دەڵێن ئەمە قسەی ئەوانەیە كە دژایەتی هەرێمی کوردستان دەكەن.

 

مرۆڤ زۆر دەبێ لێكی بداتەوە ئەم بەڕێزانە ئەم قسانە بۆ دەكەن؟ چ سوودێكی لێ دەبینن؟ پاڵنەریان بۆ ئەم جۆرە قسانە چییە؟ خۆ هەندێ جار مرۆڤ ئەم قسانە تەنها لەژێر هەڕەشەدا دەكات، كەچی ئەم بەڕێزانە بە هەموو ئازادییەكی خۆیان زۆر بێ باكانە دێنە پشتی مایكەكان و هەرچی هێڵی سووری ئەمن و ئاسایشی ئەم هەرێمەیە دەیبەزێنن و كەناڵەكان و تۆڕە كۆمەڵایەتییەكانیش بۆ لایک و زیادكردنی بینەر، بێ هیچ بەرپرسیارێتییەكی  پیشەیی یان یاسایی یاخود هەر هیچ نا نەتەوەیی و ئەخلاقی، بۆیانی بڵاو دەكەنەوە.

 

زۆر جێی پرسیارە، كەسێک گەیشتبێتە ئاستێكی وەک ئەندامێتی پەرلەمان یاخود وەزارەت و بەشداریی لە حكومەتدا و كۆنە وەزیر بێت كەچی بایی ئەوە لە ئاسایشی نەتەوەیی تێنەگەیشتبێت كە لە لێدوان و چاوپێكەوتنە میدیاییەكانیدا رەچاوی بكات؟ ئایا ئەمە نەزانینە؟ 

 

بێگومان ئەم سیاسەتە بەشێكە لە سیاسەتی هەندێک هێز و كەسی ئۆپۆزسیۆن كە پێیان وایە گوایە "بە دژایەتی قەوارەی هەرێم دەكرێ لە هەڵبژاردنەكاندا دەنگ زیاد بكەن" بەڵام ئایا ئەزموونەكان لەمبارەوە چیمان پێ دەڵێن؟

 

ئەگەر تەماشای دەرەنجامەكانی دوو هەڵبژاردنی پێشووی هەرێم و عێراق بكەین دەبینین نەخێر ئەم لێكدانەوەیە بە تەواوی هەڵەیە و پێچەوانەیە.

 

هەموو ئەو كەس و لایەنانەی دژایەتی قەوارەی هەرێمی كوردستانیان كرد لە هەردوو ئەو هەڵبژاردنەدا كەوتن و متمانەی خەڵكیان لەدەستدا.

 

دیارە ئەم دەرەنجامانە كە دەبێت بۆ ئەو لایەن و كەسایەتییانە جێی لێكۆڵینەوە بێت بەڵام ئەوان تا ئێستا خۆیانی لێ لائەدەن و هەموو شرۆڤەیەكیان بۆ دۆڕاندنی هەڵبژاردن بە عەلاگەی ساختەكاریدا هەڵدەواسن، لەكاتێكدا ئەوەش كە سەرپەرشتی ئەو دوو هەڵبژاردنەی كردووە كۆمسیۆنێكی عێراقی بووە.

 

بەهەر حاڵ  زۆر گرنگ بوو ئەو هێز و كەسایەتییانە پێداچوونەوە بە سیاسەت و لێدوانەكانی خۆیاندا بكەن لەنێوان هەرێمی کوردستان و بەغدا دا و پێوەریان تۆڕە كۆمەڵایەتییەكان نەبێت، بەڵكو باشترین پێوەر دەرنجامی دەنگدانە ئەمە جگە لەوەی خودی هەستی نیشتمانپەروەری داوای ئەوەمان لێدەكات سیاسەت و دیدگامان لەسەر بنەمای بەرژەوەندی میلەتەكەمان داڕێژین و دەستكەوتەكان بەهێزتر بكەین .

 

بێگومان ئەوەش دەرەنجامێكی زۆر ئاساییە كە پەیڕەوانی سیاسەتی (دژایەتی قەوارەی هەرێم) پێگەی سیاسیان لە ناو خەڵكی كوردستاندا لە دەستبدەن، چونكە خەڵك و دەنگدەران بە گشتی قەوارەی هەرێمی كوردستان بە موڵكی خۆیان دەزانن و نایانەوێت لە هیچ شوێنێكەوە بكەوێتە ژێر هەڕەشە.

 

بەگشتی جەماوەری كوردستان هەر دژایەتیەک بۆ ئەم هەرێمە بە دژایەتی بۆ خەون و خواستێكی نەتەوەیی خۆیان دەبینن، كە هەر كوردێک لە هەركوێی جیهان بێت و هەڵگری هەر ئایدۆلۆژیایەك بێت بە هی خۆی دەزانێت، قەوارەی هەرێمی كوردستان لە دەرەوەی رەخنە و ململانێ سیاسییەكانە.