فایلی خەڵک؛ ساڵێکە شەقامێکی گەڕەکی ژین لە هەولێر تێکدراوە و چاکنەکراوەتەوە

ئاڤا نیوز

ماوەی نزیکەی ساڵێک دەبێت شەقامی سەرەکی گەڕەکی ژین لە ناحیەی دارەتووی هەولێر تێکدراوە، و تا ئێستا نۆژەن نەکراوەتەوە و بە خۆڵی ماوەتەوە.

چیرۆکی سەرەکی: شەقامی سەرەکی گەڕەکی ژین لە هەولێر ماوەی نزیکەی ساڵێکە بە بیانووی ئەوەی دەکرێتە جووتساید تێکدراوە و چاکنەکراوەتەوە، ناڕەزایی دانیشتووانەکەی لێکەوتووەتەوە.

لێدوانی فەرمییەکان: 

هەڤاڵ عەبدولواحید دانیشتوێکی گەڕەکی ژین بە ئاڤا ی وت: بەهۆی خراپی و پڕ زەحمەتی ئەم شەقامە کە تەنها سێ کیلۆمەترە سێ ئۆتۆمبێلم گۆڕیوە.

محەممەد ئەحمەد دانیشتووێکی دیکە گەڕەکەکە وتی، "هەر وەک پیشوو بووایە باشتر بوو، شەقامەکە یەکساید بوو بڕیار بوو بیکەنە جووتساید، بەڵام ئاوا بۆیان بە جێهێشتووین ئۆتۆمبێلەکانمان وێران بوونە.

ئومێد تاریق غاز فرۆشی گەڕەکەکەیە و دەڵێت: کارکردنم زۆر زەحمەت بووە، و تایەکانی ئۆتۆمبێلەکەم دەبێت زوو زوو بگۆڕم بەهۆی خراپی ئەم شەقامە. 

بۆچوونی لایەنی بەرامبەر: مەریوان هادی، بەڕێوەبەری گشتیی شارەوانی هەولێر بە ئاڤا میدیای ڕاگەیاند: ئەو شەقامە زیاتر لە دوو ملیار دیناری پێویستە تاوەکو نۆژەن دەکرێتەوە و دەکرێتە جووتساید، بەڵام بەهۆی نەبوونی پارە لە بانکەکان و خەرج نەکردنی بەشێک لەو پارەیە بۆ بەڵێندەر، وای کردووە تا ئێستا ئەم شەقامە بەو شێوەیە بمێنێتەوە، بەڵام بە هەموو شێوەیەک هەوڵمانداوە و بەردەوامیشین بۆ ئەوەی بەزووترین کات دەست بە قیرتاوکردنی بکرێت.