شاندێکی دەم پارتی سەردانی ئیمرالی دەکات

ئاڤا نیوز

 

بڕیارە ئەمڕۆ شاندی دەم پارتی سەردانی ئیمرالی بکەن و لەگەڵ عەبدوڵڵا ئۆجەلان، ڕێبەری زیندانی کراوی پەکەکە کۆببنەوە. 

 

وینە گەورەکە: دوای بڕیاری چەکدانان و خۆهەڵوەشاندنەوەی پەکەکە لە ڕۆژی 12ـی ئایاری 2025، ئێستا چاوەکان لەسەر تورکیا و هەنگاوەکانی ئەو وڵاتەن لە بەرامبەر ئەو پرسە، هەروەها لە دوای کۆنگرەی 12ـی پەکەکەوە، ئەمە دووەم جارە شاندی دەم پارتی سەردانی ئۆجەلان دەکات و لە نزیکەوە دیدارییان دەبێت.

 

زانیاریی زیاتر: بڕیارە ئەمڕۆ یەکشەممە شاندێکی دەم پارتی کە پێکهاتوون لە ' پەروین بوڵدان و فایەق ئۆزگور، میدحەت سانجار، سەردانی زیندانی ئیمرالی بکەن بۆ چاوپێکەوتن و کۆبوونەوە لەگەڵ عەبدوڵڵا ئۆجەلان، پێشنیی دەکرێت سەردانەکە پەیوەندیی هەبێت بەو پەیامە کە بڕیارە لە چەند ڕۆژی داهاتوودا بڵاویبکاتەوە. 

 

زانیاریی زیاتر: ئەم سەردانەی شاندی ئیمرالی لەکاتێکدایە ڕۆژی 10 تا 12ی تەممووز، 25 تاوەکو 30چەکداری پەکەکە لە ناوچەیەکی سەر بە شاری سلێمانی، لە مەراسیمێکی تایبەت دا چەک و کەرەستەی سەربازی و ئامێری ئەلیکترۆنی لە ناوچەیەک کۆ بکەنەوە، ئەمەش وەکو نیشاندانی نییەتێکی جددییە بۆ سەرخستنی پڕۆسەی ئاشتی لە تورکیا.

 

ئەمەش بزانە: پێشتر بڕیاربوو کۆبوونەوەی شاندی دەم پارتی و سەرۆککۆماری تورکیا بکرێت دواتر شاندەکە سەردانی ئیمرالی بکەن، بەڵام ئێستا کاتی سەردانەکە پێشخراوە و پێشتر لەگەڵ ئۆجەلان کۆدەبنەوە، بڕیار وایە دوای کۆبوونەوەکەش ڕاگەیێنراوێكیان هەبێت.