سەرۆک بارزانی و مەحموود مەشهەدانی: بەزووترین کات کێشەی مووچە چارەسەر بکرێت

ئاڤا نیوز

 

سەرۆک بارزانی و مەحموود مەشهەدانی، سەرۆکی پەرلەمانی عێراق جەخت دەکەنەوە، کە نابێت بە هیچ شێوەیەک قووتی خەڵكی کوردستان تێکەڵ بە ناکۆکییەکانی نێوان لایەنە سیاسیەکان و هەردوو حکوومەتی فیدڕاڵ و حکوومەتی هەرێمی کوردستان بکرێت.

 

چیرۆکی سەرەکی: ئەمڕۆ یەکشەممە ڕێککەوتی 6ـی 7ـی 2025، لە سەلاحەددین سەرۆک بارزانی پێشوازی لە مەحموود مەشهەدانی، سەرۆکی پەرلەمانی عێراق کرد. بڕینی قووتی خەڵکی کوردستان، بارودۆخی سیاسی عێراق، کێشەکانی نێوان هەرێمی کوردستان و حکومەتی فیدراڵ و هەڵبژاردنی داهاتووی پەرلەمانی عێراق گفتوگۆیان لەبارەیەوە کرا.

 

ڕاگەیێنراوی فەرمی: بارەگای بارزانی بڵاویکردەوە، "لە دیدارەکەدا گفتوگۆ و ڕاگۆڕینەوە لەبارەی بارودۆخی سیاسیی عێراق و کێشەکانی نێوان حکومەتی فیدڕاڵ و حکوومەتی هەرێمی کوردستان و هەروەها بڕیاری بڕینی مووچەی مووچەخۆرانی هەرێم کرا و، جەخت لەوە کرایەوە کە پێویستە لە چوارچێوەی دەستوور و بە ڕەچاوکردنی بنەماکانی هاوبەشی و هاوسەنگی و سازان کێشەکان چارەسەر بکرێن، هاوکات بە هیچ شێوەیەکیش قووتی هاووڵاتیانی هەرێمی کوردستان تێکەڵ بە ناکۆکییەکانی نێوان لایەنە سیاسیەکان و هەردوو حکوومەتی فیدڕاڵ و حکوومەتی هەرێم نەکرێت.

 

ئەوەی پێویستە بیزانیت: لە کۆبوونەوەکەی سەرۆک بارزانی و مەشهەدانی جەخت کرایەوە لەوەی بە زووترین کات کێشەی ناردنی مووچە و شایستە داراییەکانی هەرێمی کوردستان چارەسەر بکرێت.

 

لەلایەکی دیکەوە: هەڵبژاردنەکانی داهاتووی ئەنجوومەنی نوێنەرانی عێراق و هەماهەنگی نێوان لایەنەکان لەپێناو چارەسەرکردنی کێشەکان و ڕاستکردنەوەی هەڵە و کەموکوڕییەکانی ناو پڕۆسەی سیاسیی عێراق تەوەری دیکەی ئەو دیدارە بوون.