ئاڤا شوێن و کاتی مەراسیمی چەکدانانی پەکەکە ئاشکرا دەکات

ئاڤا نیوز

بەگوێرەی زانیارییەکی تایبەت کە دەست ئاڤا کەوتووە، چاوەڕوان دەکرێت ڕۆژی هەینی مەراسیمی چەکدانانی پەکەکە لە سنووری دەڤەری پشدەری سلێمانی بکرێت و نوێنەری بەشێک لە لایەنە سیاسییەکانی تورکیاش بەشدار بن. 

وێنە گەورەکە: هەردوو دەزگای هەواڵگریی تورکیا (میت) و دەزگای هەواڵگریی عێراق بە ئاگاداری و هەماهەنگیی حکومەتی هەرێمی کوردستان، ئامادەکاریی پێویستییان کردووە بۆ ڕێکخستنی شێوازی چەکدانانی پەکەکە، چاوەڕوان دەکرێت ڕۆژی هەینی، پەکەکە بۆ سەلماندنی نیازپاکی خۆیان، یەکەم گەڕی چەکدانان جێبەجێ بکات.

زانیاریی زیاتر: چاوەڕوان دەکرێت عەبدوڵڵا ئۆجەلان، ڕێبەری زیندانیکراوی پەکەکە، پەیامێکی ڤیدیۆی تایبەتی لەبارەی پڕۆسەی ئاشتییەوە هەبێت کە ڕۆژی چوارشەممە یاخود پێنجشەممە بڵاودەکرێتەوە. 

لەلایەکی دیکەوە: بەگوێرەی زانیارییەکان بڕیارە شاندی دەم پارتی بۆ بەشداربوون لە یەکەم گەڕی مەراسیمی چەکدانانی پەکەکە ڕۆژی پێنج شەممە بێنە هەولێر. 

لێدوانی فەرمی: محمەممەد کەماچ، پەرلەمانتاری دەم پارتی بە ئاڤای ڕاگەیاند: بە ئەگەرێکی زۆرەوە ئێوارەی ڕۆژی چوارشەممە شاندی دەم پارتی بۆ بەشداریکردن لە مەراسیمەکە دێنە هەرێمی کوردستان و دواتر دەچنە سلێمانی.

جگە لە شاندی دەم پارتی نوێنەر و پەرلەمانتارانی لایەنە سیاسییەکانی تورکیاش بۆ بەشدایکردن لە مەراسیمەکە دێنە هەرێمی کوردستان، هاوکات لە ئەوروپاش چالاکوان و نوێنەری چەند لایەنێک بەشدار دەبن. 

ئەوەی پێویستە بیزانیت: چاوەڕوان دەکرێت دوای بەڕێوەچوونی یەکەم مەراسیمی چەکدانانی پەپەکە لە ڕۆژی هەینی لە سنووری دەڤەری پشدەر و بە دیاریکراوی لە نێوان گوندەکانی تووەسووران و بانووەقەل بکرێت. 

پەیوەست بەم بابەتەوە: بەگوێرەی ئەو زانیارییانەی کە لە سەرچاوەیەکی تایبەتەوە دەست ئاڤا کەوتووە، گەر هاتوو ڕۆژی هەینی یەکەم گەڕی چەکدانانی پەکەکە بە سەرکەوتووی بەڕێوەچوو، دواتر سەرۆککۆماری تورکیا وتارێکی مێژووی لەبارەی پڕۆسەی ئاشتییەوە پێشکەش دەکات. 

بەتەنیشت ئەم بابەتەوە: ئیبراهیم کاڵن، سەرۆکی دەزگای هەواڵگریی تورکیا سبەی سەردانی بەغدا دەکات، ڕۆژی چوارشەممە لەگەڵ نوعمان کورتوڵموش ئۆغلو کۆدەبێتەوە، دوای ئەوەی کۆمیسیۆنی پەرلەمان بۆ پرۆسەی ئاشتیی دەست بەکار دەبێت.