لە کەرکووک بەرپرسێکی ئەمنیی بەتۆمەتی "هەڕەشەکردن" دەستگیر دەکرێت

ئاڤا نیوز

جێگری بەڕێوەبەری پۆلیسی پارێزگای کەرکووک بەتۆمەتی "هەڕەشەکردن" لە دوو ئەفسەر و بەپێی یاسای خراپ بەکارهێنانی مۆبایل دەستگیرکراوە.

چیرۆکی سەرەکی: عەمید عەباس قادر، جێگری بەڕێوبەری پۆلیسی پارێزگای کەرکووک کە لەسەر پشکی پێکهاتەی تورکمان ئەو پۆستەی وەرگرتووە، کێشەی لەگەڵ دوو ئەفسەری پۆلیس هەبووە و بە سیمکارتی تۆمارنەکراو (علوج) هەڕەشەی لێکردوون.

زانیاریی بەدەستهاتوو: ئەو دوو ئەفسەرە لە وەزارەتی ناوخۆی عێراق سکاڵا تۆمار دەکەن و دەڵێن هەڕەشەیان لێکراوە و کێشەیان لەگەڵ عەمید عەباسدا هەیە، دواتریش دەزگای ئاسایشی نیشتیمانی عێراق لێکۆڵینەوە لە دۆسییەکەدا دەکەن و بۆیان دەردەکەوێت عەمید عەباس هەڕەشەکەی کردووە، بۆیەش دەستگیری دەکەن.

زانیاریی پەیامنێر: سەرچاوەیەکی ئەمنیی لە کەرکووک بە دیار محەممەد، پەیامنێری ئاڤا میدیای ڕاگەیاند، "عەمید عەباس بەپێی ماددەی 433 لە یاسای خراپ بەکارهێنانی مۆبایل دەستگیر کراوە".