لە شەش مانگدا 24 کەس بەهۆی مینەوە گیانیان لەدەست داوە یان بریندار بوون

ئاڤا نیوز

 

ژمارەی گیانلەدەستدان و برینداربوون بەهۆی تەقینەوەی مین زیادی کردووە، بەجۆرێک تەنیا لە شەش مانگی یەکەمی ئەمساڵ 24 کەس بەهۆی تەقینەوەی مینەوە گیانیان لەدەست داوە یان بریندار بوون.

 

وێنە گەورەکە: بەهۆی هێرشەکانی ڕژێمە یەک لە دوای یەکەکانی عێراق بۆ سەر خەبات و بزاڤی ڕزگاریخوازی کوردستان و شەڕی عێراق - ئێران و شەڕی تیرۆرستانی داعش، مەزەندە دەکرێت مین و تەقەمەنی لە 776 کیلۆمەتر چوارگۆشە لە خاکی هەرێمی کوردستان چێنرابێت، لە ساڵی 1992 ـەوە تا ئێستا زیاتر لە 72%ـی ئەو ڕووبەرەی بە مین و پاشماوەی جەنگیی نەتەقیوو داپۆشرابوو، پاککراوەتەوە، لەگەڵ ئەوەشدا ساڵانە دەیان هاونیشتمانی لەو ناوچانەی مینڕێژکراون، بریندار دەبن یان گیان لەدەست دەدەن.

 

لێدوانی فەرمی: عەلی میران، بەڕێوەبەری گشتیی کاروباری تەکنیکی لە دەزگای گشتیی کاروباری مین بە ئاڤا میدیای گوت: ئەمساڵ 24 کەس بەر مین و تەقەمەنی کەوتوون، ئەمەش بەراورد بە ساڵانی ڕابردوو زیادی کردووە.

 

زانیاریی زیاتر: بە گوتەی عەلی میران هۆکاری زیاد بوونی ژمارەی بریندار و گیانلەدەستدان بە مین دەگەرێتەوە بۆ: 
-  نەبوونی نەخشەی ناوچە مینڕێژکراوەکان.
-  هەڵکەوتەی تۆپۆگرافی هەرێمی کوردستان.
- چوونی هاونیشتمانیان  بۆ ناوچە مینڕێژکراوەکان بۆ کۆکردنەوەی گژوگیای بەهارە.

 

ئەمەش بزانە: تا ئێستا 13 هەزار و 609 کەس لە هەرێمی کوردستان بەهۆی مین و تەقەمەنی بریندار بوون یان گیانیان لەدەست داوە، بەجۆرێک لەو ژمارەیە زیاتر لە هەشت هەزار کەسیان گیانیان لەدەست داوە.