ئاڤا سۆراغی ئەو گەنجە کوردانە دەکات کە لە لیبیا دەستگیر کراون؛ دووشەممە ئازاد دەکرێن

ئاڤا نیوز

 

ئاڤا سۆراغی ئەو گەنجە کوردانە دەکات لە لیبیا دەستگیر کراون و وادەی ئازادکردنیشیان لەسەر زاری سەرچاوەیەکەوە ڕادەگەیێنێت. 

 

وێنە گەورەکە: گەنجانی هەرێمی کوردستان و بەشێکی دیکەی وڵاتانی ناوچەکە بۆ گەیشتن بە کەناراوەکانی ئیتاڵیا ڕێگای لیبیا بەکاردەهێنن، لە دوو ڕۆژی ڕابردوو هەواڵی ڕفاندنی چەند گەنجێکی کورد بڵاوکرایەوە و ئاڤا میدیا دوایین زانیاریی لەبارەیانەوە ئاشکرا دەکات.

 

لێدوانی فەرمی: سەرچاوەیەک لە تەرابلسی لیبیاوە بە ئاڤای ڕاگەیاند: ئەو گەنجانە ژمارەیان 24 کەسە و ماوەی 10 ڕۆژە لە لیبیان، هەفتەیەک لەمەوبەر لە بازگەیەکدا لە تەرابلس ڕاگیران و بەشێکیان جلی "کۆماندۆ"یان لەبەردا بووە، بۆیە ڕاستەوخۆ دەستگیر کراون و خراونەتە زیندان.

 

ئەوەی پێویستە بیزانیت: ئەو سەرچاوەیە بە ئاڤای گوت: قسەم لەگەڵ پارێزەری ئەو گەنجانە کردووە و بڕیارە دووشەممەی داهاتوو ئازاد بکرێن، بۆیە کەسوکاریان دڵنیا دەکەینەوە لەوەی ئەو گەنجانە سەلامەتن و لە ژیاندان، هەروەها پێویست بە هیچ دڵەڕاوکێیەک ناکات.

 

ئەمەش بزانە: پێشتر ئاڤا میدیا پەیوەندیی بە عەبدولخاڵق محەممەد، بەڕێوەبەری ڕاگەیاندنی فەرمانگەی پەیوەندییەکانی دەرەوەی حکومەتی هەرێمی کوردستان کرد و گوتی: هەرێمی کوردستان لە لیبیا نوێنەرایەتی نییە، بۆیە زەحمەتە بتوانین بەخێرایی سۆراغیان بکەین، هەروەها کەسوکاری ئەو گەنجانە پەیوەندییان بە فەرمانگەوە نەکردووە.