ئەنجوومەنی باڵای دادوەری ئاماری نوێ لەبارەی جێبەجێکردنی یاسای لێبوردنی گشتی بڵاو دەکاتەوە

ئاڤا نیوز

ئەنجوومەنی باڵای دادوەریی عێراق، ئامارێکی نوێی سەبارەت بە جێبەجێکردنی یاسای هەموارکراوی لێبوردنی گشتیی ژمارە 27ـی ساڵی 2016 بڵاوکردەوە. ژمارەی ئازادکراوان گەیشتووەتە 27 هەزار و 974 کەس.

وێنە گەورەکە: بەپێی یاسای لێبوردنی گشتیی، ئەنجوومەنی باڵای دادوەری عێراق بڕیاری ئازادکردنی زیندانییان دەدات، دواتر وەزارەتی داد نووسراوێک ئاڕاستەی ئەنجوومەنەکە دەکات بۆ دڵنیابوون لە بڕیاری بنەبڕی ئازادکردنەکە، ئەگەر زیندانی تاوانبار نەبێت لە کەیسێکی دیکە  ئازاد دەکرێت.

ڕاگەیێنراوی فەرمی: بەپێی ڕاگەیێنراوێکی ئەنجوومەنەکە، کۆی گشتیی ئەو کەسانەی بەپێی یاساکە لە زیندان و بنکەکانی ڕاگرتن ئازاد کراون، گەیشتووەتە 27 هەزار و 974 کەس.

ژمارەکان وادەڵێن: ژمارەی ئەو تۆمەتبارانەی کە یاساکە گرتووینەتەوە لەوانەی فەرمانی گرتن یان بانگهێشتکردنیان هەبووە، یان بە کەفالەت ئازاد بوون و سزای غیابییان بۆ دەرچووبوو گەیشتووەتە 119 هەزار و 315 کەس.

لەلایەکی دیکەوە: سەبارەت بەو بڕە پارانەی کە وەرگیراونەتەوە، لە بەرامبەر زیندانیکراوان، ئەنجوومەنەکە ڕایگەیاندووە کە کۆی گشتیی بڕە گێڕدراوەکان بریتییە لە 22 ملیار و 374 ملیۆن و 631 هەزار دیناری عێراقی.

باکگراوند: ڕۆژی 2025-02-18، هەر سێ یاسای لێبوردنی گشتیی و باری کەسیی و گەڕانەوەی موڵک بۆ خاوەنە ڕەسەنەکانیان لەڕۆژنامەی "وەقائیع" بەفەرمی بڵاوکرایەوە، بەمەش هەر سێ یاساکە کەوتنە بواری جێبەجێکردنەوە.