لە هەولێر لە نۆ ڕۆژدا 11 بەنزینخانە بەهۆی خراپی کوالێتی بەنزین داخراون

ئاڤا نیوز

 

11 بەنزینخانە لە هەولێر بەهۆی فرۆشتنی بەنزینی کوالێتی خراپ بە شۆفێران داخراون و سزای دارایی دراون، هەر بەنزینخانەیەکیش لە ساڵێکدا سێ سەرپێچی بکات، سێ مانگ دادەخرێت.

 

وێنە گەورەکە: تیمەکانی پشکنین لە بەڕێوەبەرایەتیی نەوت و کانزاکانی هەولێر ڕۆژانە سامپڵی زیاتر لە 40 بەنزینخانە دەبەنە تاقیگە، ئەگەر کوالێتی پێکهاتەکانی بەنزین هاوتای ستاندارد نەبێت، بەنزیخانەکان ڕووبەڕووی سزای پێبژاردن و داخستن دەبنەوە.

 

لێدوانی فەرمی: بەڕێوەبەرایەتیی نەوت و کانزاکانی هەولێر دەڵێت، "لە 01-07-2025 تاوەکو 09-07-2025، نزیکەی 300 پشکنین کراوە و 11 بەنزینخانە لە سەنتەری پارێزگای هەولێر داخراون و سێ ملیۆن دینار سزای دارایی دراون."

 

ئەمەش بزانە: بەهۆی زۆری ژمارەی سەرپێچی بەنزینخانەکان، وەزارەتی سامانە سرووشتییەکان سزاکانی قورستر کردووە، لەمەودوا هەر بەنزینخانەیەک لە ساڵێکدا سێ جار سەرپێچی بکات، ماوەی سێ مانگ دادەخرێت و سەرووی پێنج ملیۆن دینار سزای دارایی دەدرێت.