یەکەم هەڵوێستی ئەمریکا لەبارەی پەیامەکەی ئۆجەلان

ئاڤا نیوز

 

بەرپرسێکی ئەمریکا ڕایگەیاند، واشنتن بە پەرۆشەوە چاودێریی پرۆسەی ئاشتی لە تورکیا دەکات و وەک هەنگاوێکی "گەورە" دەیبینێت، ئومێدەواریشە پەیامەکەی ئۆجەلان سەرەتایەک بێت بۆ کۆتاییهاتنی کێشەکان. 

 

وێنە گەورەکە: ڕۆژی چوارشەممە عەبدوڵڵا ئۆجەلان، ڕێبەری زیندانیکراوی پەکەکە بۆ یەکەمجار لەدوای چارەگە سەدەیەک پەیامێکی ڤیدیۆیی بڵاوکردەوە و تیایدا جەختی لە هەڵوەشاندنەوەی پەکەکە و کۆتاییهاتنی خەباتی چەکداریی کردەوە، داواشیکرد هەنگاوەکانی پرۆسەی ئاشتی و چارەسەری پرسی کورد لەڕێگەی لیژنەیەکی پەرلەمانی تورکیاوە بە یاسایی بکرێن و جێبەجێ بکرێن.

 

لێدوانی فەرمی: تۆم باراک، نێردەی تایبەتی ئەمریکا بۆ سووریا بە ئاژانسی نۆرس پرێسی ڕاگەیاند، بە پەرۆشەوە چاودێریی پرۆسەی ئاشتیی و پێشهاتەکانی تورکیا دەکات، وەک هەنگاوێکی "گەورە" دەیبێنێت و مانای وایە ناوچەکە بە تەواوی گۆڕانکاری بەسەردا دێت، پرۆسەی ئاشتیش لە تورکیا کاریگەری لەسەر سووریا دەبێت و ئەوە پرسێک بوو دەبووایە زۆر لەمەوبەر چارەسەر بکرابووایە.

 

ئەوەشی خستووەتەڕوو، شانازیی بە هەنگاوەکانی تورکیا، ئۆجەلان و پەکەکە لەم بوارەدا دەکات و ئومێدەوارە ئەو هەنگاوەی ئۆجەلان "کۆتایی سەرەتا و سەرەتای کۆتایی" بێت.

 

ئەو مانایە دەگەیێنێت: "کۆتایی سەرەتا و سەرەتای کۆتایی" ڕستەیەکی فەلسەفییە و مانای وایە هەموو کۆتاییەک سەرەتایە بۆ شتێکی نوێ، هەموو سەرەتایەکیش لەناوخۆیدا کۆتایی شتێکی دیکەی هەڵگرتووە، ئەوەش سرووشتی ژیانە کە هیچ کات ناوەستێت و هەردەم بەردەوامە و خۆی نوێ دەکاتەوە.