بەهۆی ئاگرەكەی قەرەداغ تەندروستیی دوو كارمەندی پۆلیسی دارستان تێكدەچێت

ئاڤا نیوز

لەماوەی چەند ڕۆژێكدا، چەند جارێك ئاگر لە دەڤەری قەرەداغ كەوتووەتەوە، بەڕێوەبەرایەتیی پۆلیسی دارستانی پارێزگای سلێمانی ڕایدەگەیەنێت، "دوو كارمەندمان لە كوژاندنەوەی ئاگرەكان، تەندروستییان تێكچووە."

وێنە گەورەكە: لە ڕۆژی 7ـی تەمموز ئاگرێک لە بەرزاییەكانی شاخی سەگرمە بەڕووكاری گوندی جافەران كەوتەوە، بەهۆیەوە ڕووبەرێكی فراوانی دارستان سووتاون، سەرەڕای هەوڵەكان بۆ كۆنترۆڵكردنی ئاگرەكە، لە ماوەی سێ ڕۆژدا بە بەردەوام ئاگرەكە كڵپەی دەسەندەوە، هێزێکی پۆلیسی دارستان و ژینگەی قەرەداغ و بنکە و خاڵەکانیان، بەشێوەیەکی ڕێکخراو دەستیانکردووە بە کوژاندنەوەی ئاگرەکە، هاوکات هێزی  پشتیوانی لە کارمەندانی بەشی پۆلیسی دارستانی شارەزوور، هەروەها مەفرەزەی بنکەی پۆلیسی دارستانی تەکیە و شۆڕش لەگەڵ بەشی پۆلیسی دارستانی سلێمانی و بەشێک لە تیمی فڕۆکەوانی و هێزە ئەمنییەکان و دانیشتووانی دڵسۆزی سنورەکە، لە كووژاندنەوەی ئاگرەكە پشتیوان بوون.

هۆکارە زانراوەکان: بەهۆی سەختی سنوورەکە چەند جارێک ئاگرەکە دوای کوژاندنەوەی، دروست دەبووەوە. دوو کارمەندی پۆلیسی دارستانی سەر بە پارێزگای سلێمانی، بەهۆی كاریگەربوونیان بە دووکەڵ و ماندووبوون، دۆخی تەندروستیان تێکچوو؛ دواتر چارەسەریان وەرگرت.

ئەوەی پێویستە بیزانیت: ئێستا ئاگرەکە کۆنترۆڵ کراوە و لێکۆڵینەوە و بەدواداچوون دەستی پێکردووە بۆ دۆزینەوەی هۆکاری سەرەکی کەوتنەوەی ئاگرەکە مەزندە دەکرێت نزیکەی 320 دۆنم لە پوش و دارستان سووتابێت، لەگەڵ بەشێك لە ڕەز و باخێکی هاووڵاتیان.