ئاگرکەوتنەوەکانی لازقیە دەروازەیەکی گرنگی نێوان سووریا و تورکیا دادەخات

ئاڤا نیوز

سووریا داخرانی دەروازەی سنووریی "کەسەب"ی لەگەڵ تورکیا بە شێوەیەکی کاتی ڕاگەیاند و هۆکارەکەشی بۆ بەردەوامیی ئەو ئاگرە بەرفراوانانە گەڕاندەوە کە لە چیاکانی کەناراوی ئەو وڵاتە کەوتوونەتەوە و مەترسیی نزیکبوونەوەیان لە ناوچە سنوورییەکان دروست کردووە.

 

چیرۆکی سەرەکی: ماوەی 10 ڕۆژ ئاگرکەوتنەوە لە ناوچە کەناراوییەکانی لازقییە دەستی پێکردووە، ئەمەش وایکرد کە ڕۆژی سێشەممەی ڕابردوو، سووریا بە فەرمی داوای هاوکاری لە یەکێتیی ئەوروپا بکات بۆ کۆنترۆڵکردنی ئاگرەکە.

لێدوانی فەرمی: مازن عەلوش، بەڕێوەبەری پەیوەندییە گشتییەکان لە دەستەی گشتیی دەروازە وشکانی و دەریاییەکانی سووریا، لەسەر پلاتفۆرمی "ئێکس" ڕایگەیاند: "داخستنەکە لەلایەن تورکیاوە ئەنجامدراوە بۆ پاراستنی سەلامەتیی گەشتیاران".

چی ڕوودەدات: زیاتر لە 150 تیمی بەرگریی شارستانی و ئاگرکوژێنەوەی سووریا، شانبەشانی چەندین تیمی خۆبەخش، بە پشتیوانیی 300 ئۆتۆمبێلی ئاگرکوژێنەوە و دەیان ئۆتۆمبێلی دیکەی لۆجستی، سەرقاڵی کۆنترۆڵکردنی ئاگرەکەن.

کێ بەشدارە: بەهۆی بەرفراوانیی ئاگرەکەوە، هەماهەنگییەکی نێودەوڵەتی بۆ ڕووبەڕووبوونەوەی ئاگرەکە دەستیپێکردووە. تیمەکانی ئاگرکوژێنەوەی زەمینی لە وڵاتانی تورکیا، ئوردن و عێراق گەیشتوونەتە ناوچەکە. ڕۆژی پێنجشەممەی ڕابردوو، بەرگریی شارستانیی عێراق ناردنی 20 تیمی پشتڕاست کردەوە. هاوکات، 16 فڕۆکەی ئاگرکوژێنەوە لە سووریا، تورکیا، ئوردن و لوبنانەوە بەشداری لە ئۆپەراسیۆنە ئاسمانییەکاندا دەکەن.

لەلایەکی دیکەوە: ڕۆژی سێشەممەی ڕابردوو، سووریا داوای هاوکاریی لە یەکێتیی ئەوروپا کردبوو بۆ کوژاندنەوەی ئەو ئاگرانەی کە لە گوندەوارەکانی لازقییە لە کەناراوەکانی سووریا لە 3ـی ئەم مانگەوە، کەوتوونەتەوە.