ئاڤا وردەکاری لەسەر شانەیەکی حیزبی بەعس لە ئەنبار ئاشکرا دەکات

ئاڤا نیوز

سەرچاوەیەکی ئەمنی بەرپرس لە پارێزگای ئەنبار پووچەڵکردنەوەی هەوڵێکی بۆ پێکهێنانی شانەیەکی حیزبی بەعسی قەدەغەکراو ئاشکرا کرد.

زانیاریی بەدەستهاتوو: بەیانی ڕۆژی شەممە  2025-07-12، هەواڵی دەستگیرکردنی عەبدولستار حامد دلێمی سەرکردە لە حیزبی بەعسی هەڵوەشاوە بڵاوبووەوە، لە کاتێکدا کە هەوڵی پێکهێنانی شانەیەکی حیزبەکەی لە ناحیەی سەقڵاوییە لە باکووری فەللوجە داوە.

لێدوانی تایبەت: سەرچاوەیەکی ئەمنی بەرپرس بە ئاڤا میدیای ڕاگەیاند: بەپێی زانیاریی هەواڵگری، هێزێکی تایبەتی حەشدی شەعبی، هەڵیانکوتایە سەر ماڵێک لە ناحیەی سەقڵاوییەی سەر بە پارێزگای ئەنبار و سەرکردەیەکی باڵای حیزبی بەعسی هەڵوەشاوە و قەدەغەکراویان بەتاوانی دروستکردنی شانەیەکی نوستووی ئەو حیزبە دەستگیر کرد.  

زانیاریی زیاتر: سەرچاوەکە وتیشی، "دەزگا ئەمنی و هەواڵگرییەکان بەردەوامن لە ڕاوەدوونانی ژمارەیەک لە ئەندامانی ئەم شانەیە لە هەندێک ناوچەی پارێزگای ئەنبار، ئەوەش دوای دەستگیرکردنی سەرکردە باڵاکە و لێکۆڵینەوەکان لەگەڵیدا بۆ ئاشکراکردنی ئەندامانی شانەکەی هات.