ئاوی پڕۆژه‌ی فریاگوزاریی خێرا ده‌گاته‌ ‌20 گه‌ڕه‌کی هەولێر

ئاڤا نیوز

پرۆژەی فریاگوزاریی خێرای ئاوی هەولێر دەگاتە 20 گەڕەک و شوێنی هەولێر، بەمەش گرفتی کەمئاوی لەو گەڕەک و شوێنانە نامێنێت.

چیرۆکی سەرەکی: دوای ته‌واوبوونی سه‌رجه‌م كاره‌كان له‌ زۆنی ڕێگه‌ی كۆیه‌ تا مووسڵ له‌ ده‌ره‌وه‌ی شه‌قامی 120 مه‌تری، بۆ ماوه‌ی 72 كاتژمێر ئاوی پرۆژەی فریاگوزاریی خێرا به‌شێوه‌ی ئه‌زموونی ده‌گاته‌ ماڵان له‌ 20 گه‌ڕه‌ك و شوێنی هه‌ولێر، تیمه‌كانیش به‌رده‌وام چاودێریی پرۆسه‌كه‌ ده‌كه‌ن.

ڕاگەیێنراوی فەرمی: وەزارەتی شارەوانی ڕایگەیاند: له‌گه‌ڵ ته‌واوبوونی كاره‌كانی پڕۆژه‌کە و دانانی تۆڕی ئاوی ناوخۆ لە هێڵە لاوەکییەکان، بەستنەوەی بە هێڵە سەرەکییەکانی پرۆژەی فریاگوزاری لە زۆنی دەرەوەی بازنەی 120 مەتری کە لە تووڕەقەوە دەستپێدەکات، شەقامی مەخموور، شەقامی کەرکووك تا شەقامی کۆیە دەگرێتەوە، ئه‌مڕۆ گشت قفڵه‌كانی سنووری زیاتر له‌ 20 گه‌ڕه‌ك و شوێنی شاری هه‌ولێر له‌ ده‌ره‌وه‌ی بازنه‌ی 120مه‌تری كرانه‌وه‌، ئاو بۆ 72 كاتژمێر به‌شێوه‌ی ئه‌زموونی ده‌گاته‌ ماڵان.

زانیاریی زیاتر: ئه‌و گه‌ڕه‌ك و شوێنانه‌ بریتین له‌ تووڕەق، مامزاوا، سەرکارێز، قەتەوی، میرزا ئەحمەد، نازماوە،  گردمحه‌مه‌د، ژیان، قەرەبووی ژیان، گردەرەشە، قەرەبووی تۆبزاوا، ئاسوودە، ڕۆشنبیری، فەرمانبەران، زیلان، 5ی حسارۆك، گەلاوێژ، هاوکاری، بێرکۆتی نوێ، بۆ ماوەی 72 کاتژمێر بەشێوەی ئەزموونی ئاو دەگاتە ماڵان، تا هاوسەنگی لە تۆڕەکان دروست دەبێت، تیمەکان بە شەو و ڕۆژ ئامادەن و کار دەکەن.

ئەوەی پێویستە بیزانیت: بە پرۆژەی ئاوی فریاگوزاریی خێرا، کێشەی ئاو بۆ ماوەی 30 ساڵی داهاتوو لە هەولێر چارەسەر دەبێت، هاووڵاتیان لە کەمئاوی وەزری هاوین ڕزگاریان دەبێت.