وەزارەتی کارەبا لە ئاڤاوە دەنگۆیەک لەسەر پڕۆژەی ڕووناکی ڕەتدەکاتەوە

ئاڤا نیوز

وەزارەتی کارەبای حکومەتی هەرێمی کوردستان، ئەو دەنگۆیانەی باس لە بردنی کارەبای گوندەکان بۆ پڕۆژەی ڕووناکی دەکەن، ڕەتدەکاتەوە.

بابەتی سەرەکی: چەند ڕۆژێکە دەنگۆیەک بڵاوکراوەتەوە، گوایە بەشێک لە کارەبای پڕۆژەی ڕووناکی لە هەولێر، لەسەر کارەبای گوندەکانی دەوروبەر دابین دەکرێت، ئاڤا بەدواداچوونی بۆ ڕاستی ئەم بابەتە کردووە.

زانیاریی تایبەت: سەرچاوەیەکی باڵا لە وەزارەتی کارەبای حکومەتی هەرێمی کوردستان بە ئاڤا میدیای ڕاگەیاند: بەهیچ شێوەیەک لەسەر کارەبای ناوچە و گوندەکانی دەوروبەر کارەبا بۆ پڕۆژەی ڕووناکی نەگواستراوەتەوە، بەڵکو لە کارەبای هەناردەکراو گەڕێنراوەتەوە.

- پێش پڕۆژەی ڕووناکی ناوچەکانی دەوروبەری هەولێر، وەک قوشتەپە ڕۆژانە 10 کاتژمێر کارەبای نیشتمانییان پێدراوە، ئێستاش هەمان بڕە کارەبای پێ دەدرێت، چونکە سەرچاوەی کارەبایان جیاوازە و پێکەوە پەیوەست نین.

- وەزارەتی کارەبا هەوڵەکانی بۆ گەیاندنی پڕۆژەی ڕووناکی بە ناوچەکانی دەوروبەری هەولێر چڕ کردووەتەوە، بەتایبەت بۆ قوشتەپە و گوندەکانی دەوروبەر.

زانیاریی ئاڤا: بەگوێرەی زانیارییەکانی ئاڤا، ئەو کارەبایەی بۆ پڕۆژەی ڕووناکی بەکاردێت، هەمان ئەو بڕە کارەبایەیە کە پێشتر بۆ بەغدا دەنێردرا.