سەرچاوەیەک لە هەسەدە بۆ ئاڤا: هەڵوێستی خۆمان لەسەر قسەکانی تۆم باراک ڕادەگەیێنین

ئاڤا نیوز

هەسەدە پەیامەکانی نێردەی تایبەتیی ئەمریکا بۆ سووریا ڕەتدەکاتەوە و ڕایدەگەیێنێت: لە ڕۆژانی داهاتوودا هەڵوێستی فەرمیی خۆمان ڕادەگەیێنین.

وێنە گەورەکە: دوای واژۆکردنی ڕێكکەوتنێکی هەشت خاڵی لە 10ـی مانگی ئاداری ڕابردوو لە نێوان مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری سووریا، هەوڵەکانی ئەمریکا بۆ یەکگرتنەوەی هێزەکانی هەسەدە و سووریا بەردەوامە، لە نوێترین کاردانەوەشدا نێردەی تایبەتی ئەمریکا بۆ سووریا گوتی: سووریا یەک وڵات دەبێت، نەک شەش وڵات." بەمەش ئەگەری هەبوونی هەرێمی ئۆتۆنۆمیی جیاوازی بۆ کورد، عەلەوی، یان درووزەکان ڕەتکردەوە.

لێدوانی فەرمی: سەرچاوەیەک لەنێو هەسەدە بە ئاڤای ڕاگەیاند: قسەکانی تۆم باراک، نێردەی تایبەتی ئەمریکا بۆ کاروباری سووریا ڕەتدەکەینەوە و لەم چەند ڕۆژەشدا هەڵوێستی خۆمان بە فەرمی لەبارەی ئەو قسانەی تۆم باراک ڕادەگەیێنین کە دەڵێت: ئێمە مافی ئۆتۆنۆمی بە کورد نادەین.

زانیاریی زیاتر: سەرچاوەکەی هەسەدە دەشڵێت: کورد هاوبەشی سەرەکیی ئەمریکا بووە لە سووریا و پاڵەوانی شەڕی داعش بووە لە وڵاتەکە، هەروەها دەبێت حکومەتی نوێی سووریا هەنگاوی کرداریی بۆ جێبەجێکردنی ڕێکەوتنامەی 10ـی ئادار بنێت.

ئەمەش بزانە: 35 پارتی کوردی لە ڕۆژئاوای کوردستان نیگەرانیی خۆیان لەسەر قسەکانی تۆم باراک، نێردەی تایبەتیی ئەمریکا بۆ سووریا دەربڕیوە.