پەرلەمانتارێکی پێشووی کۆمەڵی دادگەری لە سلێمانی دەستگیر دەکرێت

ئاڤا نیوز

هێزێکی ئەمنیی سلێمانی پەرلەمانتارێکی پێشووی کۆمەڵی دادگەری دەستگیردەکەن، ئەندامێکی ئەنجوومەنی باڵای حزبەکەش دەڵێت: 'تاوەکو ئێستا نازانرێت هۆکاری دەستگیرکردنەکەی چییە'.

چیرۆکی سەرەکی: دوای ئەوەی هەواڵی دەستگیرکردنی د.سەباح شێخ محەممەد بەرزنجی، پەرلەمانتاری پێشووی کۆمەڵی دادگەر بڵاوکرایەوە، کە گوایە لەلایەن هێزێکی ئەمنی سلێمانییەوە دەستگیرکراوە، ئاڤا بەدواداچوونی بۆ ڕاستی و هۆکاری دەستگیرکردنەکەی کرد.

لیدوانی فەرمی: شوان ڕابەر، ئەندامی ئەنجوومەنی باڵای کۆمەڵی دادگەری بە ئاڤا میدیای ڕاگەیاند: ڕۆژی 12-7-2025، د.سەباح بەرزنجی لە سلێمانی دەستگیرکراوە، بەڵام تاوەکو ئێستا هۆکاری دەستگیرکردنەکەی دیار نییە.

ئەندامەکەی ئەنجوومەنی باڵای کۆمەڵی دادگەری دەڵێت: ئەوەی ئاگاداربین هیچ کێشەیەکی نییە، بۆ ئەوەی دەستگیر بکرێت، بەپێی قسەی بە کۆمەڵ دراوە ئەمڕۆ د. سەباح ئازاد دەکرێت.

لەلایەکی دیکەوە: سەرکەوت ئەحمەد، وتەبێژی پۆلیسی سلێمانی بە ئاڤا میدیای ڕاگەیاند: د. سەباح بەرزنجی لەلای ئێمە دەستگیر نەکراوە.

زانیاریی زیاتر: ئاسایشی سلێمانی ڕایگەیاند، بەدواداچوون بۆ هۆکاری دەستگیرکردنەکە دەکەین، تاوەکو ئەو کاتەش هیچ قسەیەکیان لەسەر ئەم بابەتە نابێت.