زیاتر لە دوو هەزار کەس لەڕێگای هەولێر - گۆمەسپان کار دەکەن

ئاڤا نیوز

زیاتر لە دوو هەزار کەس لە پرۆژەی دووتسایدی نێوان کەسنەزان – دەربەندی گۆمەسپان کار دەکەن، پرۆژەکە لە کۆتایی ساڵی 2026 تەواو دەبێت.

چیرۆکی سەرەکی: پڕۆژەی دووسایدی کەسنەزان - دەربەندی گۆمەسپان، درێژی ڕێگاكە 15 كیلۆمەتر و 500 مەترە، 40 ئاوەڕۆ، چوار بەرزە پرد و یەک ژێرپردی لەخۆگرتووە، پڕۆژەكە لەلایەن كۆمپانیای هێمن گرووپەوە جێبەجێ دەكرێت و کۆتاییەکانی ساڵی 2026 تەواو دەبێت.

ڕاگەیێنراوی فەرمی: پارێزگای هەولێر ڕایگەیاند: پانی هەر سایدێکی ڕێگاکە 10 مەتر و 75 سانتیمەترە، دوو ڕێرەوی سەرەکی و ڕێرەوێکی فریاگوزاریی دەبێت، بە درێژایی دووسایدەکە چوار پرد و یەک ئەندەرپاسی تێدایە، 40 ئاوبەری سندووقی قەبارە درێژ و جۆراوجۆر، پەرژینی خۆپاراستن و سیستمی ئاوەڕۆشی دەبێت.

ئەوەی پێویستە بیزانیت: لە پرۆژەیەکەدا دوو هەزار کارمەند، 600 ئامێری جۆراوجۆر کاری تێدا دەکەن و 99%ی پشتی بە دەستی کاری ناوخۆیی بەستووە.

بۆچی گرنگە: بە بڕیارێکی ئەنجوومەنی وەزیرانی هەرێمی کوردستان، دەبێت لە سەدا 75ـی دەستی کاری پرۆژەکان کرێکاری ناوخۆیی بن، بەمەش هەلیکار بۆ هەزاران گەنج دەڕەخسێت.