بەرێوەبەری فڕۆکەخانەی هەولێر: گەشتە ئاسمانییەكان بۆ تورکیا ئاسایین

ئاڤا نیوز

دوای بڵاوبوونەوەی دەنگۆی داخستنی ئاسمانیی ئێران و وەستانی گەشتە ئاسمانییەكانی وڵاتانی ئێران و توركیا، بەڕێوەبەریی گشتیی فڕۆكەخانەی نێودەوڵەتیی هەولێر تایبەت بە ئاڤا، دواخستنی گەشتە ئاسمانییەكانی بەرەو توركیای ڕەتكردەوە و دەڵێت، هیچ گەشتێك دوانەخراوە.

وێنە گەورەكە: دەنگۆی وەستانی گەشتە ئاسمانییەكان لە فڕۆكەخانەکانی ئێران لە بەشێك لە میدیاكان و تۆڕە كۆمەڵایەتییەكان بڵاوبووەوە، هەرزوو میدیای ئێران ئەو هەواڵەی ڕەتكردەوە و ڕوونیكردەوە، دوای كۆتاییهاتنی شەڕی نێوان ئێران و ئیسرائیل، سەرجەم گەشتە ئاسمانییەكانی فڕۆكەخانەكانی ئێران لە كاتی ڕۆژ و بەدیاریكراوی لە 5ـی بەیانی تاوەكو 6ـی ئێوارە ئەنجام دەدرێن و هیچ گەشتێك بە شەو ناكرێت، ئەمەش هیچ پەیوەندیی بە بوونی مەترسی بەسەر ئاسمانی ئێرانەوە نییە.

پەیوەست بەم بابەتە: دوای بڵاوبوونەوەی دەنگۆی داخستنی ئاسمانی ئێران، بەشێك لە میدیاكان بەمجۆرە بڵاویان كردەوە، گوایە گەشتەكانی توركیا بۆ وڵاتانی ئێران، عێراق و ئوردن هەڵوەشاونەتەوە، هەرزوو ڕۆژنامەی حورییەتی تورکی، لە سەرچاوەی هێڵی ئاسمانیی تورکیاوە ئەو هەواڵانەی ڕەتكردەوە و دووپاتیكردەوە گەشتە ئاسمانییەكانی توركیا، ئاسایین.

لێدوانی فەرمی: ئەحمەد هۆشیار، بەڕێوەبەری گشتیی فڕۆکەخانەی نێودەوڵەتیی هەولێر بۆ ئاڤا میدیا ڕایگەیاند، گەشتەکانی نێوان هەولێر و تورکیا ئاسایین و هیچ گەشتێک دوانەخراوە.

پێدراوە ڕاستییەكان: میدیاكان باس لەوە دەكەن، لە جەنگی دوازدە ڕۆژەی نێوان ئێران و ئیسرائیلەوە، سیستمی (گی پی ئێس)ـی ئێران گرفتی تەكنیكی بۆ دروستبووە و جارجارە دەوەستێت، بەهۆیەوە چەند جارێك گەشتە ئاسمانییەكان بەشێوەی كاتی پەكی دەكەوێت.