پڕۆژەی فریاگوزاریی خێرای ئاوی هەولێر نرخی خانووبەرە بەرزدەکاتەوە

ئاڤا نیوز

پڕۆژەی فریاگوزاریی خێرای ئاوی هەولێر بەشێوەی ئەزموونی گەیشتووەتە بەشێکی گەڕەکەکانی هەولێر، بەمەش کاریگەریی لەسەر نرخی خانووبەرە دروست دەکات.

وێنە گەورەکە: بەهۆی دابەزینی ئاستی ئاوی ژێر زەوی لە هەولێر، لە ماوەی ڕابردوو چەند گەڕەکێک دووچاری کەمئاوی هاتن، ئێستا پڕۆژەی فریارگوزاریی خێرای ئاو گەیشتووەتە 20 گەڕەک و شوێنی هەولێر، بەمەش هاووڵاتیان لە کەمئاوی ڕزگاریان دەبێت و کاریگەری لەسەر بەرزبوونەوەی نرخی خانووبەرە لە گەڕەکەکانی هەولێر هەیە.

لێدوانی فەرمی: موخلیس حاجی محەممەد، خاوەنی کۆمپانیای بزنس دەی بۆ خانووبەرە بە ئاڤای ڕاگەیاند: گەیشتنی پڕۆژەی فریاگوزاریی خێرای ئاوی هەولێر کاریگەریی ڕاستەوخۆی لەسەر بەرزبوونەوە نرخی زەوی و خانوو دەبێت لەو گەڕەکانەی پڕۆژەکەیان پێگەیشتووە، بەمەش جموجۆلی تەواوی خستووەتە بازاڕەوە.

زانیاریی زیاتر: بە گوتەی موخلیس حاجی محەممەد، پڕۆژەکە 10% بۆ 20% کاریگەریی لەسەر بەرزبوونەوەی نرخی زەوی هەبووە، هەروەها لەسەر خانوو بە ڕێژەی نزیکەی 15% کاریگەریی هەبووە، جگە لەمەش جموجۆڵ کەوتووەتە بازاڕی شوقەکانی نێو سەنتەری شارەوە.

بۆچی گرنگە: پڕۆژەی فریاگوزاریی خێرای ئاو کێشەی کەمئاوی تاوەکو 30 ساڵی دیکە لە هەولێر چارەسەر دەکات، ئەمەش کاریگەریی ڕاستەوخۆی لەسەر ژێرخانی ئابووریی شارەکە دەبێت.