هەڵگورد شێخ نەجیب: هیچ کێشەیەک بە ئاڵۆزی و توندوتیژی چارەسەر نابێت

ئاڤا نیوز

سەرپەرشتیاری ئیدارەی سەربەخۆی سۆران ڕایدەگەینێت، "دەرگامان کراوەتەوە بۆ گوێگرتن لە داخوازییەکانی هاونیشتمانیان، پێویست بەوە ناکات گرژی و توندوتیژی دروستبکرێت، چونکە هیچ کێشەیەک بە ئاڵۆزی توندوتیژی چارەسەر نابێت".

چیرۆکی سەرەکی: لەناحیەی وەرتێی دەڤەری باڵەکایەتی لە سنووری ئیدارەی سەربەخۆی سۆران بەهۆی کەمی کارەبا، دوو ڕۆژە هاووڵاتیان خۆپیشاندانیان کردووە، بەهۆیەوە گرژی لە نێوان خۆپیشاندەران و هێزە ئەمنییەکان درووست بوو. بە داخەوە خۆپیشاندەرێک گیانی لەدەستدا و سێی دیکەش بریندار بوون.

لێدوانی فەەرمی: هەڵگورد شێخ نەجیب، سەرپەرشتیاری ئیدارەی سەربەخۆی سۆران بۆ ئاڤا میدیا وتی، "دوو ڕۆژ پێش ئێستا تیمێکمان ئامادەکرد بۆ دانیشتن لەگەڵ خۆپیشاندەران و گوێگرتن لە داواکارییەکانیان. کێشەی کەمبوونەوەی کارەبایان هەبوو، داواکارییەکانیان وەرگیران و بە ئێمە گەیێنران، ئێمەش گەیاندمانە لایەنی پەیوەندیدار".

- "لەگەڵ وەزارەتی کارەبا  دوو رۆژە لەسەر خەتین بۆ ئەوەی بڕی  کارەبا بگەڕێنینەوە سەر دۆخی ئاسایی خۆی، بەڵام بەداخەوە دوێنێ ئەو ڕووداوە نەخوازراوە ڕوویدا".

- خۆپیشاندان لە شوێنی دیکەی سنوورەکە کرا و گرژی و ئاڵۆزی لێکەوتەوە، بەداخەوە هاووڵاتییەک گیانی لەدەستدا.

- "ئێمە لەڕێگەی ئاڤاوە بە هاووڵاتیانی دەڤەرەکە دەڵێین، بە هەموو شێوەیەک پاڵپشت و هاوکارین و دەرگاکەمان کراوەتەوە بۆ هەموو گوێگرتن لە داخوازیەکانیان". پێویست بەوە ناکات گرژی و تووندوتیژی دروست بکرێت و ڕێگاکان بگیرێن.

- "هەوڵی جدی دەدەین و ئێمە لەوان زیاتر خەمخۆرین بۆ ئەوەی ئەم کێشانە چارەسەر بکەین".

- "سەرەخۆشیمان بۆ بنەماڵەی قوربانییەکە هەیە، لێکۆڵینەوە لە ڕووداوەکە دەکەین، هیوادارین بە گفتوگۆ و لێکتێگەیشتن کێشەکان چارەسەر بکەین"، چونکە هیچ کێشەیەک بە ئاڵۆزی و توندوتیژی چارەسەر نابێت. هەروەها "داوا لە هاووڵاتیان دەکەین دان بەخۆیاندا بگرن، ئێمە لە خەمەکانیان تێدەگەین".