لە هەڵەبجە کارکردن لە پڕۆژەی ڕووناکی دەستیپێکرد

ئاڤا نیوز

پڕۆژەی ڕووناکی دەگاتە پارێزگای هەڵەبجە و تیمەکانی تایبەت بە کارەبای 24 کاتژمێری دەستیان بە کارەکانیان کرد.

چیرۆکی سەرەکی: پڕۆژەی ڕووناکی بۆ کارەبای 24 کاتژمێری، پڕۆژەیەکی ستراتیژیی کابینەی نۆیەمی حکومەتی هەرێمی کوردستانە، بە پێی ئەو پلانەی بۆ پرۆژەکە دانراوە تا کۆتاییەکانی ساڵی 2026 کارەبای سەرجەم ماڵ و شوێنە بازرگانییەکان دەکرێتە 24 کاتژمێری، بەمەش هەزاران مۆلیدە لە شار و شارۆچکەکانی کوردستان دەکوژێندرێنەوە و کاریگەریی ئەرێنی لەسەر ژینگەی کوردستان دروست دەکات.

 

لێدوانی فەرمی: کاوان کەریم، بەڕێوەبەری کارەبای هەڵەبجە بە ئاڤای ڕاگەیاند: ئەمرۆ سێشەممە 15-7-2025، ڕێکارەکانی تایبەت بە پرۆژەی ڕووناکی (کارەبای 24 کاتژمێری) لە هەڵەبجە دەستیپێکرد و تیمەکان خەریکی کارکردنن، ئەمەش دەبێتە یەکەم هەنگاوی پرۆژەکە لە سنووری هەڵەبجە.

 

زانیاریی زیاتر: کاوان کەریم بە ئاڤای گوت: تا کۆتای ساڵ تەواوی سەنتەری هەڵەبجە دەبێتە خاوەنی کارەبای 24 کاتژمێری، سەرەتای ساڵی داهاتووش پرۆژەکە لە دەورووبەری هەڵەبجە دەستپێدەکات.

 

ئەوەی پێویستە بیزانیت: ئێستا زیاتر لە دوو ملیۆن هاونیشتمانی و 90 هەزار شوێنی بازرگانی کارەبای 24 کاتژمێریان هەیە و پرۆژەکە بەردەوامە لە فراوان بوون.