لە هەولێر 15 هەزار پارچە زەوی دیکە بەسەر فەرمانبەران دابەش دەکرێن

ئاڤا نیوز

ڕۆژی پێنج شەممە 15 هەزار پارچە زەوی دیکە بەسەر فەرمانبەران و خانەنشینان و وارسی شەهیدان دابەش دەکرێت. 

وێنە گەورەکە: دوای دابەشکردنی سێ هەزار پارچە زەوی بەسەر فەرمانبەرانی سنووری سەرۆکایەتیی شارەوانیی هەولێر، ئامادەکارییکراوە بۆ ئەوەی 15 هەزار پارچە زەوی دیکە بەسەر فەرمانبەران و خانەنشینان و وارسی شەهیدان دابەش بکرێت.

لێدوانی فەرمی: کارزان عەبدولهادی، سەرۆکی شارەوانی هەولێر بە ئاڤا میدیای گوت: ڕۆژی پێنجشەممە 15 هەزار پارچە زەوی بەسەر فەرمانبەران و خانەنشینان و وارسی شەهیدان دابەش دەکرێن.

- لە قۆناغی دووەم 23 هەزار بۆ 28 هەزار پارچە زەوی دیکە ئامادەکراون، لەگەڵ بەڕێوەبەرایەتیی نەخشەدانانی ئاوەدانی و بەرێوەبەرایەتیی گشتیی کشتوکاڵی هەولێر کاردەکەین، بۆ تەواوکردنی ڕێکارەکانی قەرەبووکردنەوەی خاوەن زەوییەکان و کوژاندنەوەی ئەو کەرتانەی دیاری کراون.

زانیاریی زیاتر: تیروپشکی دابەشکردنی زەوی بەسەر فەرمانبەران بەشێوەی ئەلیکترۆنی دەبێت و هەر فەرمانبەرێک ژمارەی زەوییەکەی بۆ دیاری دەکرێت و دوای تەواوبوونی ڕێکارەکانیش زەوییەکەی بۆ تاپۆ دەکرێت.

باکگراوند: لە سنووری سەرۆکایەتیی شارەوانی هەولێر لە قۆناغی یەکەمدا سێ هەزار پارچە زەوی بەسەر فەرمانبەرانی چوار وەزارەت دابەش کراون.

ئەمەش بزانە: لە هەولێر ئەو زەوییانەی ئامادەکراون بۆ دابەشکردن بەسەر فەرمانبەران کەوتوونەتە نێو ماستەر پلانی هەولێر و لەسەر ڕێگای هەولێر - دهۆکن، پێکهاتوون لە ژمارەیەک کەرت لە سنووری ئاشۆکان، گەزنە و دارەبەن.