ئیسرائیل هێرش دەکاتە سەر سوپای سووریا لە سوەیدا

ئاڤا نیوز

بنیامین نەتانیاهۆ، سەرۆکوەزیرانی ئیسرائیل و وەزیری بەرگریی ئەو وڵاتە فەرمانیان بە سوپا کردووە کە هێرش بکەنە سەر سوپای سووریا لە سوەیدا. 

وێنە گەورەکە: لە ماوەی دوو ڕۆژی ڕابردوودا، شەڕ و پێکدادان لە نێوان گرووپە چەکدارە خۆماڵییەکان و خێڵەکان لە پارێزگای سوەیدا لە سووریا ڕووی دا و سەدان کەس بوونە قوربانی، ئەمڕۆ سێشەممە، سوپای سووریا چووە نێو شارەکە، ئەمەش ئیسرائیلی نیگەران کرد و بڕیاری دا هێرش بکاتە سەر سوپای سووریا.

ڕاگەیێنراوی فەرمی: نەتانیاهۆ و کاتز لە ڕاگەیێنراوێکی هاوبەشدا ڕایگەیاند: هێزەکانی بەرگریی ئیسرائیلمان ڕاسپاردووە دەستبەجێ هێرش بکەنە سەر هێزەکانی ڕژێم و ئەو چەکانەی هێنراونەتە شاری سوەیدا بە ئامانجی ئەنجامدانی ئۆپەراسیۆن دژی درووزەکان، ئەمەش پێچەوانەی سیاسەتی داماڵینی چەکە کە گیرابووەبەر.

لە ڕاگەیێنراوەکەدا ئاماژە بەوەشکراوە، "ئیسرائیل پابەندە بە ڕێگریکردن زیان گەیاندن بە درووزەکان لە سووریا.

زانیاریی زیاتر: دوای ئەوەی هێزەکانی سوپای سووریا چوونە نێو شاری سوەیدا، سوپای ئیسرائیل دەستیکرد بە هێرشکردنە سەر تانک و ئۆتۆمبێلە سەربازییەکان.