لە کۆشکی سپی گفتوگۆ لەبارەی هەناردەکردنەوەی نەوتی کوردستان دەکرێت

ئاڤا نیوز

 

دوای تێپەڕبوونی ساڵێك بەسەر ڕاگرتنی هەناردەکردنی نەوتی کوردستان بۆ بەندەری جەیهان، ئێستا بەرەوپێشچونێك بۆ دەستپێكردنەوەی هەناردەی نەوت هەیە و بڕیاریشە لە کۆبوونەوەی بایدن و سوودانی گفتوگۆی لەبارەوە بکرێت.

 

چی ڕوودەدات؟ پێشبینی دەکرێت لە کۆبوونەوەی چاوەڕوانکراوی نێوان جۆ بایدن، سەرۆکی ئەمریکا و محەممەد شیاع سوودانی، سەرۆکوەزیرانی عێراق لە نێوەڕاستی مانگی داهاتوو لە واشنتن، باس لە هەناردەکردنەوەی نەوتی هەرێمی کوردستان بکرێت.

 

لێدوانی فەرمی: سەباح سوبحی، ئەندامی لیژنەی نەوت و گاز لە پەرلەمانی عێراق بە ئاڤا نیوزی گوت: "لە سەردانەکەی سەرۆکوەزیران بارزانی بۆ واشنتن، گفتوگۆی رژد لەبارەی هەناردەکردنەوەی نەوتی کوردستان کراوە و بڕیاریشە لە کۆبوونەوەی سوودانی و بایدن لە کۆشکی سپی، باس لە چۆنیەتیی دەستپێکردنەوەی هەناردەکردنی نەوت دەکرێت". 

 

لە لایەکی دیکەوە: مایلز کاگینز، گوتەبێژی ئەپیکۆر بە ئاڤا نیوزی گوت: "لەگەڵ زیادبوونی زیانەکان، داوای بەپەلە چارەسەکردنی کێشەکان دەکەین، بەتایبەتی کێشەکانی پەیوەست بە چۆنیەتیی قەرەبووکردنەوە و پێدانی شایستە داراییەکانی کۆمپانیاکانی بەرهەمهێنەری نەوت لە هەرێمی کوردستان".

 

ژمارەکان وادەڵێن: ڕۆژانە نزیكەی 450 هەزار بەرمیل نەوتی هەرێمی کوردستان ڕەوانەی بەندەری جەیهان لە توركیا دەكرا و بە وەستاندنیشی، نزیكەی 12 ملیار دۆلار زیان بە ئابووریی عێراق گەیشتووە. 

 

قووڵتر: رۆژی چواری نیسانی ساڵی ڕابردوو، بە ئامادەبوونی محەممەد شیاع سوودانی، سەرۆکوەزیرانی عێراق و سەرۆکوەزیران بارزانی لە بەغدا، رێککەوتنێک لەبارەی هەناردەکردنی نەوتی کوردستان واژۆ کرا بەڵام تاوەکو ئێستا ڕێککەوتنەکە جێبەجێ نەکراوە.

 

ئەوەی پێویستە بیزانیت؟ هۆکارەی سەرەکیی دەستپێنەکردنەوەی هەناردەی نەوتی هەرێمی کوردستان بۆ تێچووی دەرهێنان و فرۆشتنی نەوت دەگەڕێتەوە؛ تاوەکو ئێستا حکومەتی هەرێمی کوردستان و کۆمپانیا نەوتییەکان لەگەڵ حکومەتی عێراق لەسەر تێچووەکە ڕێکنەوکەوتوون.