وەزیری فریاکەوتنی سووریا کۆنترۆڵکردنی ئاگرەکەی لازقیەی ڕاگەیاند

ئاڤا نیوز

وەزیری فریاکەوتنی سووریا کۆنترۆڵکردنی ئاگرەکەی لازقیەی ڕاگەیاند و سوپاسی ئەو وڵاتانەشی کرد کە هاوکاربوونە لەگەڵیان بۆ کۆنترۆڵکردنی ئاگرەکە، لەنێویشیاندا عێراق.

وێنە گەورەکە: دوای 13 ڕۆژ و بە بەشداری دەیان تیمی ئاگرکوژێنەوەی لە عێراق، تورکیا، ئوردن، لوبنان و قەتەرەوە، دواجار توانرا ئاگری ناوچەکانی نزیک کەناراوەکانی پارێزگای لازقیە کۆنترۆڵ بکرێت.

لێدوانی ڕۆژنامەوانی: ڕائید ساڵح، وەزیری فریاکەوتن و بەڕێوەبردنی کارەساتەکانی سووریا، لە کۆنگرەیەکی ڕۆژنامەوانیدا، بە تایبەتی سوپاسی ئەو تیمانەی کرد کە لە عێراق، تورکیا، ئوردن، لوبنان و قەتەرەوە یارمەتییان پێشکەش کردبوو، هەوڵەکانی بە "داستانێکی مرۆیی" ناوی برد.

وەزیرەکە ئاماژەی بەوەدا کە تیمەکان ڕووبەڕووی ئاستەنگی گەورە بوونەتەوە، لەوانە بوونی مین و پاشماوەکانی جەنگ، سەختیی جوگرافیای ناوچەکە و گۆڕانی ئاراستەی بای بەهێز. هاوکات هۆشداریدا کە کارەساتی ڕاستەقینە تەنیا سووتانی دارستانەکان نییە، بەڵکو لێکەوتە درێژخایەنەکانییەتی وەک مەترسیی ڕاماڵینی خاک و لەدەستدانی ڕووەکی سەوز، بەتایبەت لەگەڵ بوونی شەپۆلی وشکەساڵی و گۆڕانی کەشوهەوادا.

زانیاریی زیاتر: ساڵح ڕوونیکردەوە کە بۆ کۆنترۆڵکردنی ئاگرەکە، سوود لە تەکنەلۆژیای نوێ وەک فڕۆکەی بێفڕۆکەوانی گەرمی و وێنەی مانگی دەستکرد وەرگیراوە. لە کۆتاییدا جەختی کردەوە کە هەرچەندە ئاگرەکە کۆتایی هاتووە، "بەڵام ئەرکی ڕاستەقینەمان تازە دەست پێدەکات" بۆ گەڕاندنەوەی ژیان بۆ ناوچەکە. پلانی داهاتووشیان دامەزراندنی سیستەمێکی نیشتمانییە بۆ پاراستنی دارستانەکان و دانانی سیستەمێکی ئاگادارکردنەوەی پێشوەختە.