حکومەتی سووریا و دروزەکان لەسەر ئاگربەست لە سوەیدا ڕێککەوتن

ئاڤا نیوز

هاوکات لەگەڵ زنجیرەیەک هێرشی چڕی ئاسمانیی ئیسرائیل بۆ سەر پێگە هەستیارەکانی دیمەشق و سوەیدا، حکومەتی سووریا و پێکهاتەی دروزەکان گەیشتنە ڕێککەوتنێک بۆ ڕاگرتنی ئۆپەراسیۆنە سەربازییەکان لە پارێزگای سوەیدا.

وێنە گەورەکە: دوای چوار ڕۆژ شەڕ و پێکدادانی نێوان هێزە ئەمنییەکانی سووریا و دروزەکان و بەشداریکردنی ئیسرائیل بە بۆردوومانکردنی چەند پێگەیەکی سەربازی سووریا، دواجار حکومەت و دروزەکان ڕێککەوتن.

ڕێککەوتنەکە بەم شێوەیەیە: ئاگربەست، کشانەوەی سوپا بۆ بنکەکانی، ڕێکخستنی چەکی قورس و سپاردنی ئاسایشی ناوخۆ و بازگەکان بە خەڵکی پارێزگاکە. هەروەها بڕیارە لیژنەیەکی لێکۆڵینەوە لە پێشێلکارییەکان پێکبهێنرێت.

ئەوەی پێویستە بیزانیت: ئەم پێشهاتە لە کاتێکدایە کە ئیسرائیل هێرشێکی بەرفراوانی ئاسمانیی بۆ سەر سووریا دەستپێکردووە و وەک خۆی دەڵێت، بۆ پاراستنی دروزەکانە.

زانیاریی زیاتر: هێرشەکان کۆشکی سەرۆکایەتی و وەزارەتی بەرگرییان لە دیمەشق کردووەتە ئامانج و زیانی گەورەیان لێکەوتووەتەوە. بەپێی زانیارییەکان، ئیسرائیل خۆی بۆ چەند ڕۆژێکی شەڕ ئامادە دەکات و هێزی زیاتر بەرەو سووریا دەجوڵێنێت.

ژمارەکان وادەڵێن: بەپێی بەرگریی شارستانیی سووریا، لە ئەنجامی هێرشەکانی سەر دیمەشق، تا ئێستا کەسێک گیانی لەدەستداوە و 20ـی دیکەش بریندار بوون، لەگەڵ وێرانکارییەکی زۆر لە باڵەخانەکاندا.