مەزڵووم عەبدی: خەڵكی سوەیدا داوای بەدەنگەوەهاتنیان لێ كردووین

ئاڤا نیوز

فەرماندەی گشتیی هەسەدە ڕایدەگەیێنێت، خەڵكی سوەیدا داوای بەدەنگەوەهاتنیان لێ كردووین بۆ كردنەوەی ڕێڕەوێكی سەلامەت بەمەبەستی گواستنەوەی هاووڵاتیانی مەدەنی.

وێنە گەورەکە: دوای چوار ڕۆژ لە شەڕ و پێکدادانانی نێوان هێزەکانی سووریا و دروزەکان، دواجار ئاگربەست ڕاگەیێنرا، بەگوێرەی نوێترین ئاماری ڕوانگەی سووری بۆ مافەكانی مرۆڤ، سەرووی 300 كەس كوژراون، كە نزیكەی 100 لە كوژراوان سەربازن.

لێدوانی فەرمی: مەزڵووم عەبدی، فەرماندەی گشتیی هێزە چەكدارەكانی سووریای دیموكرات، لە هەژماری فەرمیی خۆی لە تۆڕی كۆمەڵایەتی 'ئێكس' پەیامێكی بڵاوكردووەتەوە و ڕایگەیاندووە، خەڵكی سوەیدا داوایان لێكردووین بەدەنگیانەوە بچین و داوای ڕاگرتنی ئەو هێرشانە دەكەن كە خەڵكی شارەكەی بە ئامانج گرتووە.

زانیاریی زیاتر: مەزڵووم عەبدی ئاماژەی بەوەشكردووە، "كوشتنی ئافرەتان و منداڵان و دەستدرێژیكردنە سەر سیمبولە ئایینییەكان، تاوانی دژ بە مرۆڤایەتی و بەها باڵاكانی سووریان، پێویستە دەستبەجێ پەلامارە دوژمنكارییەكان ڕابگیرێت و لێپرسینەوەش لە بەرپرسانی ئەو ڕووداوانە بكرێت."

دوای 14 ساڵ لە ڕشتنی خوێنی سوورییەكان، كاتی ئەوە هاتووە خوێنڕشتن ڕابگیرێت؛ سووریا بە تۆڵەسەندنەوە و پاكتاوكردن هەڵناستێتەوە، بەڵكو بە گفتوگۆ و هۆشمەندی ئەوە دەكرێت.

پرسی گەلی دروز پرسێكی نەتەوەییە و چارەسەرەکەی لەڕێگەی دەستوور و دیالۆگەوە دەبێت.